North East Zone Inter-State & Zonal Badminton Championship 2025 kheh zawh takah Tirza Lalremruati chuan hmarchhak record siamin kum 13 leh thla sarih mi chauh niin hmeichhe maltanah final a thleng a, champion zo ta lo mah se silver medal leh record chhuanawm tak nen a haw.
NSRCC Indoor Hall, Agartala, Tripura-a Ningani atanga Pathianni thleng awh inelnaah hian team leh mi mal inelnaa kalpui niin Mizo shutter 20 leh anmahni hruaitu pali an kal a. Team event-ah gold leh silver pakhat ve ve leh bronze medal pahnih lain team event awm zawng zawngah medal an la kim vek a. Individual event-ah silver leh bronze pathum ve ve an vaw chhuak bawk.
Kolasib Hmar Veng naupang, Tirza-i hian mi mal inelnaa women’s singles-ah final-ah hian Assam innghahna leh category pathuma gold la thei awmchhun, Shanti Priya Hazarika chu straight set-in a hneh lo va. A tum hlen zo lo mah se North East Inter-State Championship senior category-a final lut thei naupang ber record a siam a, record duhawm bik nen inelna a chhuahsan ta tho a ni.
Sihphir Badminton Club (SPBC)-a khel lai, Tirza-i hi Mizoram Badminton Association (MBA)-in July thlaa Yonex-Sunrise P.C. Gabriel Lalliansanga Memorial MBA Senior Official Championship 2025 a buatsaihah khan Mizoram record siamin kum 13, thla ruk leh ni 12 mi niin MBA-in senior huang inelna a buatsaiha final thleng thei naupang ber a lo ni tawh a. Hemi tum hian a hma kum chiaha H. Lalrinhlui’n champion naupang ber record a siam chu khum theihna remchang nei mah se final-a hian a tlawm zawkah a tang ta hlauh a ni.
MBA-in August thla tira Mizoram State Sports Council (MSSC) kum 50 tlin lawmna atana NEXA Aizawl Yonex-Sunrise MSSC Golden Jubilee Celebration MBA Junior Official Championship 2025 a buatsaihah khan U-19 Girl’s Singles-ah final a lo lut tawh bawk a, hemi tum hian U-15 Girl’s Singles-ah a champion nghe nghe.
Team inelnaah Mizoramin gold a vuak chhuahna awmchhun, U-19 Boy’s-ah Sikkim tum hmasa berin singles-ah H. Lalthazula inlanin doubles-ah C. Lalramsanga leh Sainunmawia Sailo te an inlan thung a, 2-0-in an chak a. Semifinal-ah a ngai bawka inlanin Arunachal Pradesh chu 2-0-in an hneh leh a. Final-ah Manipur chu 2-0 bawkin an hneh leh.
U-19 Girl’s-ah silver vaw chhuakin final-ah Assam chu 2-1-in an hneh lo va. Singles-ah Lalrinkimi leh H. Lalrinhlui te inlan in, doubles-ah H. Lalrinhlui leh Lalrempuii te an inkawp a. Nagaland leh Arunachal Pradesh te hnehin final an lut.
Men’s-ah nikum final-a an hneh loh, Manipur lakah 3-1-a tlawmin semi final-ah an tla a, bronze medal an dawng a. Women’s-ah pawh Assam nen intumin, 3-1 in an chak lo a, bronze medal an dawng a ni.
Team event bik ah hian Assam-in gold pathum lain an sang ber a, Mizoramin gold pakhat nen dawtin Manipur-in silver pathum lain pathumnna an ni.
Individual-ah Tirza-i bakah U-19 Girl’s doubles-ah Zoramthari leh Ramngaihzuali te inkawpin final an lut bawk a. An kalkawngah Manipur player tha, Seeded No. 2 pawh vaw tlain, Nagaland player langsar an hneh bawk a. Final-ah erawh Hazarika leh Bhavishya Changmai te lakah 21-16, 11-21, 14-21 in an tlawm a, silver medal an la.
U-19 Mixed Doubles-ah Lalrempuii leh Sainunmawia Sailo ten final an thleng bawk a. Harsatna tawk lem loin final hi an lut, final-ah Assam pair, Aanayan Borah leh Changmai te tumin 19-21, 21-17, 19-21-in an tlawm a, chair umpire thuthlukna siam fuh tawk loh vang ni ngeia ngaih theih a ni.
Mi mal inelna bikah hian H. Lalrinhlui (U-19 GS), H. Lalrinhlui & Obet VT Lalrinsanga (Mixed Doubles) leh Vanlalhruaia Sailo & Vanlalpeka Sailo (U-19 BD) ten bronze medal an hlawh chhuak bawk.
He inelna hi November-a neih tur, 47th National Junior Badminton Championship leh December-a neih tur, 87th National Senior Badminton Championship-a tel thei tur thlanna a ni pah a. Singles bikah mi mal inelna a semifinal thleng chinten direct entry nei nghalin, doubles-ah final thlengten an nei nghal bawk.