Aizawl: Inrinnia Sairang Railway Station hawnga Mizoram tlawh tur, Prime Minister Narendar Modi-a dawnsawn dan tur leh hun hmanpui dan tur inpuahchahnate chu Thawhtanni khan Home Minister K Sapdanga hovin thlir a ni.
Secretariat Conference Hall, MINECO, Aizawla thutkhawmah hian home minister chuan India state dangte leh Mizoram thlunzawmna tur rel kawng hawng tura prime minister kal tur chu tha taka dawnsawn a pawimawh thu a sawi a. A châm chhunga hun hlawk tak a hman theih nan kalkhawmte chu an mawhphurhna theuh tha taka hlen turin a chah.
Thutkhawmah hian Lengpui Airport, Sairang Railway Station, Thuampui Helipad leh Aizawl Lammuala venhimna, chawlh hahdamna hmun, inkalpawhna tha leh inbiakpawhna, thutna leh medical duty ruahman dan enho a ni a. Prime minister hmuha pho chhuah tur thil chi hrang hrang buatsaihte enho a ni bawk.
Khilli Ram Meena, Chief Secretary-in hmalakna hrang hrang a sawi zau va, inbuatsaihna thlen tawh chinte a sawi.
Thutkhawmah hian Director General of Police; Principal Secretary, GAD; Commissioner & Secretary, PWD leh Health & Family Welfare, Coorperation, Power & Electricity, Art & Culture, ICT, School Education, Horticulture, Planning & Programme Implementation, Information & Public Relations Department, North Eastern Frontier Railways leh mawhphurhna nei, sorkar department aiawhte an tel a ni.