India chuan vice president thar tur chu Thawhlehni khan a thlang a, BJP kaihhruai National Democratic Alliance (NDA)-in CP Radhakrishnan vawrh chhuakin eptu tangrual, INDIA-in B Sudershan Reddy an vawrh chhuak thung a, he chanchin ziah lai hian thlan chhuah hriat a la ni lo.
Radhakrishnan-a hi Maharashtra governor ni lai niin Reddy-a hi Supreme Court judge hlui a ni a. July thlaa a hrisel lohna chhuanlama bâng, Jagdeep Dhankhar thlaktu tur an ni.
Inthlanah hian party langsar pathum – Biju Janata Dal (BJD), Bharat Rashtra Samithi (BRS) leh Shiromani Akali Dal (SAD) chuan vote an thlak ve dawn loh thu an sawi.
Odisha chief minister hlui, Naveen Patnaik-a kaihhruai BJD hian tumah tan bik an neih loh avangin an hai dawn tih an sawi a. Anni hian Rajya Sabha-ah MP pasarih neiin Lok Sabha-ah an nei lo.
Telangana chief minister hlui, K Chandrashekar Rao-a kaihhruai BRS hian an state-a lo neituten lei tihthatna an tlakchham nasat avangin inthlan an boycott tih an sawi a. Rajya Sabha member pali neiin Lok Sabha-ah an nei lo.
SAD hian an state, Punjab-a tui lian nasa tak awm mekah sorkar laipui leh an state-a roreltu, Aam Aadmi Party (AAP)-in chet an thawh lo duh lovin vote an thlak lo va. Anni hian MP pakhat, union minister hlui, Harsimrat Kaur Badal-i an nei.
Vice president thlan vote thlak hi New Delhi-a Parliament House-ah chawhma dar 10:0-a tanin tlai dar 05:00 thleng hun hawn a ni a, tlai dar 06:00 atangin vote chhiar a ni ang a, zan rei deuh hnuah result hriat beisei a ni.
Vice president hi parliament in hniha member-te thlan niin tunah hian vote nei 788 an awm mek.
Inthlan chuh tur hian an hming chhawpchhuaktu (proposer) leh lo thlawptu (seconder) MP 20 ve ve tal neih a ngai a, security deposit-ah Rs 15,000 dah a ngai bawk a. Secret ballot hmangin single transferable vote (STV) system-a vote thlak a ni.
MP-te hian an duh zawkah ‘1’ leh an duh loh zawkah ‘2’ chu an dah zel a ni.
India-ah hian vice president hi danpui hnuaia thuneitu sang ber pahnihna niin Rajya Sabha-a chairperson a ni bawk a. Inthlan hi dan pangngaiah kum nga dana neih tur a ni a; mahse, Dhankhar-a’n a hrisel lohna chhuanlama a kalsan avangin a hunbi hmaa inthlan a ni a. Kum 1987 pawh khan a hun hmaa inthlan hi huaihawt a lo ni tawh.