Aizawl: Mizoram Journalists’ Association (MJA) General Headquarters hruaituten nimin khan larsap, General (Dr.) Vijay Kumar Singh chu a chenna, Raj Bhavan-ah an kawm.
An inkawmnaah hian MJA hruaitute chuan an member-te tan India sipai hmun pawimawh tlawh dilna Lok Sabha MP Richard Vanlalhmangaiha kaltlanga Union Defence Minister Rajnath Singh hnena an theh luh chu a hlawhtlin theih nan theihtawpa bawhzuisak turin an ngen a. Larsap hian theihtawpa lo bawhzuipui tur thu a hrilh.
An inkawmnaah hian Mizo thalai tam zawk sipaia an luh theih nan theihtawp chhuahpui tur te, Mizo Regiment din theih dan tur te, Mizorama Army Battalion leh airforce station din a nih theih dan tur te, Mizo thalai tam zawk sipai officer-ah an luh theih nan Chhingchhip-a Sainik School chu tha taka a kal a, a changtlun zel theih nan hmalak dan tur pawh sawi lan a ni.
Larsap chuan Mizo thalai sipaia tan tum zingah lehkha pawimawh nei famkim lo an awm thin chu harsatna pakhat a nih thu a sawi a. Lehkha pawimawh – voters ID, aadhar card leh ration card-ah te hming inmil thlap neih a tulzia thu thehdarhpuiah MJA hruaitute a sawm bawk.