Aizawl: MNF party chuan Assembly Speaker Lalbiakzama’n chief minister-in dawt a sawi sawi mamsak a tum chu pawi an tih thu sawiin a chet dan chu a dinhmun hman sualnaah puhin mipui hnenah ngaihdan dil an phut.
Nimina thuchhuah an siamah MNF party chuan September 8, 2025-a Speaker Lalbiakzama’n a pisaa thu thar thehdarhtute a kawm tumin, a dinhmun lo chelh tawh thinten political party pisaah pawh an sawi ngai loh, ruling party tanna sawh ngheh tumin, house chhunga rorelna kalpui dan chu langsar taka tan lam neiin a sawi chhuakah an puh a. Assembly House chhung leh pawnah pawh thu lai latu tur, tan lam tilang lo tur leh house member zawng zawngte zahawmna venghimtu tur berin chanchinbu mite hmaah meuh politics-a tan lam nei rana thu a sawi duh ta mai chu mak an tih thu an sawi.
MNF chuan house chhunga chief minister-in chawp leh chilha dawt chiang tak a sawi, a hnua hailana lo awm leh ta sawi mawipui a tum dante enin, chief minister ber hian press conference nei tur hian speaker hi ‘a lalna kha tak hmachhuanin a nawrlui em ni?’ tih zawhna a piang nghal a. Speaker hian ama thu ngeia press conference-a a thusawite hi a sawi a nih phei chuan nihna hman sualna leh speaker zahawmna venhim zawh lohna nasa tak a nih avangin speaker atanga inhnukdawk ngam ngei turah an ngaih thu an sawi.
“Speaker dinhmun luahtute hi assembly house chhung leh pawn lamah pawh lai taka awm tura beisei leh ngaih, a nih laia tuna speaker dinhmun luah mektuin ZPM speaker ang maia press conference kova sorkar lo awm tawhte beihna lam hawi leh, ruling party tanna sawhngheh tumna lam hawi a sawi ve chiam ta mai hi hmun danga thleng ve ngai lo leh Mizoramah pawh la thleng ngai lo a ni a. Politics-a hamthatna lak tuma hmanraw hman remchang lote thlenga hmang duh zel ZPM sorkar Mizoramin kan hrawn hi a vanduaithlak takzet a ni,” MNF chuan an ti.