Sairang atanga rel tlan dan leh a chuan man tur chungchangah engmah thu chiang hriat a la ni lo.
Inrinni hian Prime Minister Narendra Modi-a’n Aizawl Lammual atangin Sairang leh Bairabi inkar rel kawng a hawng dawn a. A hawn rualin khualzin phur rel tlantir nghal a ni dawn a. Tun dinhmunah rel chuan man leh a tlan dan tur hriat chian theih a la ni lo.
Tun lai hian social media-ah Sairang atanga rel chuan man tur, a tlan rei hun chhung tur leh a tlan hun tur thehdarh a ni a. Hemi chungchangah railways hotute erawh chuan he thu hi an hriatpui loh thu leh a tlan dan tur hi engmah hriat chian theih a la nih loh thu an sawi.
Thawhtanni khan thu thar thehdarhtu mi eng emaw zatin an president, C Lalrambuatsaiha hovin Sairang leh Bairabi inkar rel kawng tlawhin Sairang atanga Bairabi thleng relah an chuang a. Rel bawkin Bairabi atangin Sairang thleng an leh a. Kawng lakah Northeast Frontier Railways (NFR) hotuten rel kawng chanchinte an hrilhfiah a ni.
The Zozam Times zawhna chhangin NFR-a Public Relations Officer Nilanjan Deb chuan, “Social media-a darh chu sawi theih ka nei lo. Lehkhaa hming ziak hnan ka hmuh phawt loh chuan kei chuan engmah ka confirm thei lo. Sairang atanga rel chuan man leh a tlan dan kalphung tur te, a tlan rei hun chhung tur te chu social media ni lo, chanchinbu kaltlangin kan tichhuak ang. Rel dan dan turte chu Delhi-a railways thu thu a ni. Hun rei vak lohah chuan puanzar a ni ang. Tuna chiangah chuan Delhi, Guwahati leh Kolkata a service dawn,” a ti.
Sairang leh Bairabi inkar rel kawng hi a lian chi (broad gauge) niin, km 51.38-a thui a ni a. Station panga – Bairabi, Hortoki, Kawnpui, Mualkhang leh Sairang te a awm a. Sairang Rel Station hi 6,372 sq.m a zau a ni a, chhawng thum a ni.
Leiverh (tunnel) 48 awmin leiverh thui ber chu km 1.37 a ni a. Leiverh 48 thui zawng belhkhawm chu km 12.853 a tling a. Lei lian 55 leh lei tê 87 awmin rel kawng thar hi km 51.38-a thui a ni a, zaa 25 chu leiverh a ni.
Lei 142 a awm a, sang ber chu Kurung Ruama lei dawh niin India rama pier bridge dawhah a sang ber a, metre 114 laia sang niin Qutub Minar aiin metre 42-in a sang a ni.
- Station inhlat dan:
Bairabi to Hortoki – 16.72 kms
Hortoki to Kawnpui – 9.71 kms
Kawnpui to Mualkhang – 12.11 kms
Mualkhang to Sairang -12.84 kms