Mipuiin ei ruk nasa lutuk duh lova punkhawmna lian tak huaihawta police nen an innawrnaa mi 19 an thih tuk, Thawhlehni khan Nepali Prime Minister KP Sharma Oli chuan bânna a thehlut.
Mipui thinrim hian Thawhlehni khan an khawpui, Kathmandu-ah parliament an hal a, meikhu dum chhah tak a chhuak nasa hle a. Ram chhung hmun hrang hrangah sorkar building leh politics hruaitute chenna beih a ni bawk.
Thawhlehniah hian mi pathum thi an awm belh leh nia sawi a ni a. Buaina nasa tak awm karah hian Nepal khawthlang district-a lung in pahnihah mi tang 900 an tlan chhuak bawk niin lung in thuneituten an sawi.
Mipuiten lungawi lohna an lantir hi sorkarin social media platform a khap an duh lohna atanga intan a ni a. Thawhtanni khan khapna hi hlih nghal ni mah se ram pumah ei rukna nasa lutuk duh lohna lian taka lantir zui a ni.
Nepali army chief chuan Thawhlehni zan khan thuchhuah siamin lungawi loh lantirna remchanga hmanga thil tichhia, mi rawk leh vantlang leh mi thil halte chu man chhuah vek an ni dawn tih a sawi.
Buaina hi a awm zel a nih chuan ‘Nepal Army telin, boruak thunun turin venhim hna thawktu pawl zawng zawng an chet chhuah tur thu’ a tar lang tel a. Hei hi zan dar 10:00 (India-a zan dar 09:45) atanga hman tan a nih tur thu a sawi.
Prime minister a bân hnuah hian tu nge a aiawh dawn tih emaw, engtin nge an kal zel dawn tih emaw chiang a awm lo va, sorkar hotu ber pawh an awm rih lo va. Minister telin, hruaitu thenkhat chu venhim hna thawktute venna hnuaiah an tawm mek bawk.
Hetih lai hian mipuite pawhin hruaitu mumal tak an nei bik lo.
Parliament luhna bul velah mipui za rual an lâm a, an au rual a, tam tak chuan Nepal flag an keng bawk.
Thenkhat chu a chhungah lutin tukverh zawng zawng an tikeh a. A pawn lamah milem leh sorkar duh lohna thu hrang hrangte an ziak bawk.
Kar hmasa khan Nepali sorkar hian inziah luh hun a tiama inziak lut lo social media platform 26 khapna thupek a tichhuak a. Platform zingah hian Instagram leh Facebook phei chu mi maktaduai tam takin an hman, hlimhlawp, chanchin thar hriatna leh sumdawnna atan an hmang.
Sorkar hian chanchin thar dik lo, inhuatna leh online-a inbumna tam lutuk tihtawp nan an khap niin an sawi a. Thalaite chuan zalen taka an duh an sawi ve theihna khapsakah an puh thung.
Khapna hi Thawhtanni zanah hlip leh nghal mah se lungawi lohna kal chu dan theih a ni ta chuang lo va, politics-a langsar zualte beih rawnin ram pum buaina a chhuak zui a ni.
Social media khap a nih hma atang khan ‘nepo kid’ campaign tan ni tawhin politician fate nuamsa taka an khawsa leh ei rukna nasa duh lohna hi lantir a ni tawh a. Hei hi social media khap chhan ber nia ngaih a ni nghe nghe.
Thalai rual pungkhawm chuan Thawhtanni khan parliament building hi luhchilh an tum tawh a. District tam takah curfew puan a ni a. Thi zinga a tam ber hi parliament leh sorkar building hnaia thi an ni.
Thawhlehni khan lungawi lohna lantir chhunzawm niin Kathmandu-ah chuan sorkar tangruala tel, Nepali Congress Party hmunpui leh an hruaitu, Sher Bahadur Deuba in an hal.
Communist Party hruaitu, vawi li prime minister ni tawh, kum 73 mi, Oli-a in pawh hal a ni a. A hnuah danpui hmanga an buaina chin fel a nih theih nan a bâng tih a puang zui.