Daniel Ricciardo chuan car intlansiak a chawlhsan thu a puang a, Global Ford Racing Ambassador ni thin, tuna Ford Racing tia hming thlak ta chuan ambassador atan an hmang dawn a ni.
Formula 1 driver hi F1 intlansiakah vawi riat a chak hman a, tunlai driver zinga a lar pawl a ni pha a. Netflix series ‘Drive to Survive’-ah pawh telin first season-ah a inlan a. Tunah chuan intlansiak a chawlhsan thu puangin intlansiak tumna a neih tawh rih loh thu a sawi.
Ricciardo chuan, “Intlansiak chu chawlhsan mah ila lirthei ka lawmna chu a reh dawn chuang lo a. Ford nen kan inkawp thei tur hi ka lawm a, Global Ford Racing Ambassador ka ni tur hi thil chhuan tham em em niin ka hria,” a ti.
“Ford Racing team nen tha takin kan thawkho dawn a, Raptor bik hi kan thlurbing nasa dawn a, Ford dawrtute zinga tla na ber ni mek, Raptor chawi san zel hi kan tum dawn a ni,” a ti bawk.
A sawi zelnaah, “Intlansiak chawlhsan chungchang hi hun rei tak chhung ngun deuhin ka ngaihtuah a. Ka chawlhsan hnua lirthei kaihhnawih nen inzawm zui zel dan kawngte ka rilruin ka dap kual bawk a ni,” a ti.
“Ka tan chuan intlansiak hi thil nuam em em a ni a. Min tihlim a, ka dam chhunga ka hriat reng tur thil thlentu lian ber a ni,” a ti bawk.
Nikuma Singapore Grand Prix zawha F1 a chhuahsan hnuah khan Ricciardo hi IndyCar team leh NASCAR team chuan an sawm nasa hle a. Ford chuan a telna team, Red Bull an hne hnai ngar ngar a, chawlh a puan takah chuan an hling bet nghal chat a ni.
October thlaa Ford Raptor Rally neih a nih hunah Ricciardo hi tel tura ngaih a ni a. Kum 2017 ah khan Raptor hi a lo lei tawh tih a sawi bawk.