Aizawl: MNF Sr Vice President Dr R Lalthangliana chuan kawng hrang hrangin Mizoramah Mizo nationalism-in beih a tawk mek niin a sawi.
Nilaini khan West Phaileng, Kawnmawi, Chhippui, Lallen, Parvatui, Saithah leh Phuldungsei khuate a fannaah Dr R Lalthangliana hian thu sawiin, kawng hrang hrangin Mizoramah Mizo nationalism-in beih a tawk mek tih sawiin, ram leh hnam humhalhna kawnga beidawng tawh leh hnung lam hawi tawhte MNF-ah lo let leh turin a sawm a. Neutral tam tak hnam veitute pawh ram leh hnamin a chhung atang ngei a beih a tawh mek lai hian penchhuak a, haw khawm turin a sawm bawk.
Dampa bial MNF official candidate Dr R Lalthangliana chuan, “MNF-in kan hum ngai kan luah leh hi a ngai a ni. Party angin kan MLA Pu Rintluanga Sailo thihna hi kan sun a, a hmangaih a bial mipuite hian Pu Rintluanga chhungte leh MNF mittui luang mek hi min hnem turin kan ngen a ni,” a ti a. “ZPM hi he bialah hian tling leh ta se sorkarah thil danglam em em a awm dawn lo a. Sorkarah dinhmun pawimawh zawng zawng an luah khat vek tawh,” tiin, Dampa bial mipuite chu an vote dilin, Pathian leh ram tan nghet takin an ding dawn tih a sawi.
Khaw hrang hrang an fan naah Dampa bialtu MLA thi ta, Lalrintluanga Sailo nupui Biakthuami pawhin thu a sawi bawk.