Aizawl: Conservation Mizoram chuan Mizoram legislative Assembly-a resolution siama Forest Conservation Amendment Act 2023 pawm a ni chu pawi an tih thu sawiin, he a pawmna thu hi sut leh ngei turin ram roreltu, mipui aiawha thlan tlinte an ngen.
Nimina an thuchhuahah Conservation Mizoram chuan FCAA 2023 hian ramngaw hrilhfiahna leh a humhalhna chungchanga dan awmsa a tihdanglam danah, Mizoram chhunga chengte tana him lo nasa tak a awm nia an hriat avangin he dan siamthar hi Mizorama hman ve a him lo tih sawiin, Mizoram chhunga hman anih lohna tura hma la ngei turin ram hruaitute an phut thu an tar lang.
Conservation Mizoram chuan, “He dan siam danglam hian tlangmi kan nihna a kan ram neihdan kalphung te a ti him lo va, kan dikna chanvo tam tak kan chan thei dawn niin a lang a. Ramngaw leh a chhunga chengte humhalh leh venhim chungchangah pawh tun aia nghawng thalo zawk nei thei tur nia a lan avangte, nungchate leh an chenna hmun hlu tak tak – kan ‘community forest’ leh kan hnam kalphung te humhim a nih zel theih nan he dan hi Mizorama hman a nih ve lohna tura thawkho zel turin mitin te kan sawm a ni,” an ti.