Aizawl: Mizoram khawthlang lam kawlphetha lak luh leh pekchhawnna tihchangtlunna tur North Eastern Region Power System Improvement Project (NERPSIP) hnuaia hnathawh mek, 132/33kV Sub-Station West Phaileng a mi leh 132/33kV Sub-Station Marpara a mi te chu nimin khan P&E Minister F. Rodingliana’n a enfiah.
Marpara Sub-Station leh West Phaileng Sub-Station sak hna hi September 2018 khan bul tan a ni a, mi mal compensation leh forest clearance lama harsatna awm avangin a hun a zawh theih lohin rei tak a awm a, tunhnaiah Mizoram sorkar hmalaknain forest clearance atan Rs nuai 189.71 chu Forest department-ah pe in, hnathawh chhunzawm leh theih a lo ni ta a ni.
Tun dinhmunah hian Sub-Station sak hna leh Transmission line thlun hnate zawh vek tawh niin, 33kV level-a test charge tawh a ni a, 132kV level-a test charge leh tur hian Regional Load Dispatch Centre (RLDC)-ah First Time Charging (FTC) phalna nghah mek a ni.