Aizawl: Forest Minister Lalthansanga chuan ZPM kaihhruai sorkar hotute chu vawiin thlengin eirukna leh hlemhletna lakah an la fihlim nia an hriat thu a sawi.
Dampa bial by-election neih tura campaign beihpui thlakin Forest Minister Lalthansanga, P&E Minister F Rodingliana leh ZPM official candidate Vanlalsailova ten Dampa bial khaw hrang hrang an tlawh.
Lalthansanga chuan, ZPM hian danglamna bik an nei a, chu an danglamna chu ram hawpkhawp an thar theih tawh lohna rama hawpkhawp an thar leh theih nan leh, Mizoram dinthar lehna tur atana fatu an ni tih sawiin, “Ram rawngbawltu kan ni a, chuvang chuan eirukna leh hlemhletna lakah pawh tun thlengin kan hotute an la fihlim niin kan hria,” a ti.
Forest minister chuan ZPM party chu kalphung thar aupuitu an nih angin an huang an zauh tur a ni a, mi tin an leng tur tih sawiin, an auhla ang ngeiin sorkar hna lakahte, sorkar hamthatna awmte thlan chungchangah pawh a tling leh thate leh a phu ngawih ngawihte chauh an la in an thlang a, party induhsakna leh chhung leh khat leh unau induhsakna an ti ngai lo tih a sawi.
Khaw hrang hrang an tlawhnaah P&E minister leh Dampa bial by-election neih tura ZPM official candidate Vanlalsailova te pawhin thu an sawi.