AZL: All Mizoram CSS Employee Coordination Committee (AMCECC)-in an thil phut sorkarin a la tihhlawhtlin loh avang ni thum chhung a huhova chawlh (mass casual leave) an lak chu vawiin thleng a awh dawn a. Nimin thlengin sorkar nen inbiakna an la nei lo.
AMCECC chuan sorkara an lungawi lohna an lantir avangin mipuiin harsatna nasa tak an tawk mek tih hriain mipuite hriatthiamna an ngen a. An lungawi lohna mass casual leave hmanga an lan tir chhunga sorkar atanga thu lawmawm emaw, an lungawina khawp thu dawn emaw a awm loh chuan an kal zel dan tur an ngaihtuah leh dawn tih an sawi.
AMCECC hian sorkara an thil phut hrang hrang, Regularization of CSS Employees Scheme, 2024 a taka hman te, Health Department hnuaia PE Health Worker mi 31-te CSS Scheme hmanga a dahngheh sut leh te, CSS hnuaia thawkte dan lova lak anga sawi chungchanga a mawhphurtu zawn chhuah leh action lak te chu a hlawhtlin ngei an beisei a, a hlawhtlinna an hmuh hma chuan lungawi lohna hi kalpui zel an tum thu an sawi bawk.