Aizawl: Dampa bial by-election neih turah MPCC chuan an party candidate atan John Rotluangliana, Vice President an ruat.
Nilaini khan candidate puan inkhawm hi Congress Bhavan-ah neih niin, MPCC President Lal Thanzara’n Dampa bial by-election neih turah an party candidate atan John Rotluangliana ruat a nih thu a puang.
Congress President Lal Thanzara chuan MNF-in an rawng huai an ser a, Congress pawhin an vice president an ser ve dawn tih sawiin, “Kum 1983 khan Dampa bial hi Phuldungsei bial ni a, PC sorkar laiin by-election-ah Congress party candidate Liansuama chu thlan tlin a ni tawh a, a kum leh 1984 general election-ah Congress party chuan seat 30 awmah seat 20 lain kan lo sorkar tawh a ni,” tiin, tun tumah pawh hian an candidate hi Pathianin Congress kaithawh lehna hmanrua a nih an beisei tih a sawi.
Lal Thanzara chuan John Rotluangliana chu Dampaa Congress hruaitute duh rawn an nih thu leh an lungrualna a nih thu a sawi bawk.
Dampa bial by-election Congress candidate atana puan, John Rotluangliana pawhin thu sawiin, by-election hi rorel lai party chanpualah ngaih thin ni mah se, tuna rorel lai hi an che chhe em a, belh tlakah an ngaih a rin loh thu a sawi a. ZPM candidate Vanlalsailova chu lo tling pawh ni se, eng nihna mah an pek a rin loh thu a sawi.
John Rotluangliana chuan Congress candidate an thlang tling a nih chuan kum 2028 MLA election-ah chuan Congress party-in hnehna an chang ngei dawn tih sawiin, hemi tur atana meichher lo chhi alh hmasa turin Dampa mipuite a sawm.