Dampa bial MNF MLA candidate Dr R Lalthangliana chuan Dampa bial fang chhunzawm zelin, Phuldungsei, Phulpui, Pukzing, Pukzing Vengthar, Hruiduk leh Marpara-te nimin khan a tlawh a. Lalrintluanga Sailo chhungte’n an tawiawm.
Dr R Lalthangliana chuan, Dampa bial by-election-ah ZPM candidate an thlan tlin hian ministry a khawih danglam dawn lo tih sawiin, “A ngai reng dawn. Sorkarah nihna pawimawh zawng zawng an luah vek tawh a ni. Eng pawh nise, kan phu miah loh mah nise, Pu Rintluanga Sailo vanga kan tahna mittui min hruk hul pui teh u, tiin Dampa mipuite kan ngen a ni,” a ti.
Khaw hrang hrang a tlawh naah MNF General Secretary TJ Lalnuntluanga, ex-minister pawhin thu a sawi a. “ZPM thli a dik zawnga tleh kha tunah chuan an tana a tha lo zawngin, a lêt zawngin a tleh tawh a. Mipuiin an lam an hawi ta mang lo. Mipui an beidawng ta em em a ni. Tunah chuan MNF thli a dik zawngin a tleh tan mek,” tiin MNF hmabak a eng tan leh mek niin a sawi.