Aizawl: Chief Minister Lalduhoma chuan kuthnathawka eizawng an tam avangin lo neituten tui tha an mamawh tih a sawi.
Nimin khan Chief Minister Lalduhoma pisa-ah Irrigation & Water Resources Minister PC Vanlalruata leh department hotuten department hmasawnna tur thil pawimawh hrang hrang an sawiho.
Chief minister chuan Mizoramah kuthnathawka eizawng an tam avangin lo neituten an thlai chawmna tur tui tha an mamawh ang an hmuh theih nan Irrigation & Water Resources hotute chu theihtawp chhuah turin a chah a. An department chuan kuthnathawktute tan hmalak theihna an nei ngah a, hmalakna tur leh hmachhawpte pawh ram ro tling tur vek an ni tih sawiin, project tha tak tak an nei phawt anga a hlawhtlin theihnan an bawhzui zel dawn tih a sawi.
Irrigation & Water Resources hotute chuan an hmalakna hrang hrang an sawi a. An hmalakna tur zingah NABARD atanga sum hmuh Rs. vbc 29.6 senga thawh tur, Mamit-a Tuidai Multipurpose Project kalpui tur te, Brahmaputra Board kal tlanga Tlawng lui Springshed Rejuvenation kalpui turte, Ngur – Vapar Multipurpose Dam siamna tur hmun chu forest clearance buaipui tan turte leh Serlui B HEP tui hman hnu tam tham tak luangral thin hi a thlang lama thlai chingtute tana hman tangkai dan tur ruahmanna te a tel.