India prime minister Narendra Modi chuan Mizoram tana chhinchhiah reng tur Bairabi – Sairang rel kawng chu inrinni khan a rawn hawng ta rup mai. Kan ram tan hian history pawimawh a ni reng tawh dawn a. Ei leh bara kan hmasawnna tur rahbi thar tuk a ni ta hi a va lawmawm em. India sorkarin a tum ber pakhat India hmarchhak a thimna sutkianna chuan kan ram min rawn pawh ve ta a ni.
He rel kawng hawnna a Prime minister thusawite hi a lawmawm em em a. He rel kawng avang hian mipuite chuan kan mangan pui em em thin kan thlai tharte chu state pawn lamah thawn chhuakin sum siam nan kan hmang ve thei tawh ang a. Kan ramah thalaite hna a pung ang a. Hnathawh tur nei lo tam takin hnathawh tur an lo neih belh ang. Hmasawnna lamah tih tak takin ke kan lo pen ve thei tawh dawn a ni.
Hetih rual hian PM thusawia lawmawm em em chu Mizoram hian chhim lamah Bay of Bengal tuipui kan pawh theihna tura hmalakna hi a ni. Kaladan Multi Model Transport Project hi a ni a. He project hian Mizoram chu kan tan chauha hmasawnna pawimawh ni lovin, India hmarchhak state te tan sumdawnna leh hmasawnna kawngpui a ni tur hi a ni a. Hmawngbuchhuah thlenga rel kawng siam tum a ni bawk. Mizoram hi state dang atanga engkim mai la lut thin kan nihna chu a thawnchhuaktu kan ni ve thung tawh dawn a. Kan ramah sum a rawn luanglut ve hum hum tawh turah a ngaih theih ang a. Chu chuan mi ram dinhmun angah min hlangkai ve ngei ang. Mizoram hi India tan state pawimawh kan ni ve tawh ang a. Duh hun huna road block min siamkhum thintu Assam lam pawhin min mamawh ve tak tak dawn ta a ni.
Kan ram dinhmun tur hi PM thusawi atang hian a pawimawh dawn tih a lang a. Chu tih rual chuan ram kilkhawr, inkalpawhna nei mumal lo kan nihna avang rethei hi kan dinhmun dik tak a lo lang chiang ta hle bawk. Khawvel geo politics in her kualah hmun pawimawh ber pawl kan ni tih a lo lang a. India politics mai ni lovin, South Asia a hmun remchang lai tak India, Bangladesh leh Burma ramri laiah kan lo awm a. China in Bay of Bengal tuipui hman tangkai a tum em em atan pawh kan ram hi hmun pawimawh a lo ni reng mai. He kan pawimawhna lai hi kan ram hotute hian hmang tangkai thiam se a va duhawm em. Delhi vai ho hian helai hmun pawimawh a chengte hi min ngaihpawimawh a ngai a ni tih hi kan hotute hian an hrilh hriat thiam ve a, karfung rawlhna remchangah pawh an hman thiam phawt chuan a tangkai hle dawn a ni tih hria se a tha hle mai. Ti rawh an tih apiang yes sir ti ringawt lo va, kan duh leh mamawh sawi ngam ve kan nihna hi theihnghilh hauh lova hmanraw hriama an hman ve a hun ta. India hian kan ram hi khawvel changkanga a invawrh ve theihna turin a mamawh em em a. Khawvelah hian in mamawh tawn vek, tih theih nei vek kan ni a. Mi tana kan ram a tangkai ruala midang pawh hman tangkai thiam hi mifing nihna chu a ni mai a. India in kan ram a mamawh a, India hmarchhak tih changkan nana a hman duh dawn chuan kan thu hi kan rawlh huai viau ve thei tur a ni bawk ang. India in ram venhim nana kan ram a mamawh chuan mipuite mamawh pek hi a bat ve a ni. Kan duh kan sawi hi an tih loh chuan an thu anga awm reng pawh hi kan ba lo a ni tih an hriat ve theih nana huai ve pawh a ngai. India in a mamawhna lai chauh kan thlir thei ngawt bik lovang. Kan dinhmun lokal zel tur chu kan hotute ah a innghat e.