Aizawl: Aizawl East II bialtu MLA B. Lalchhanzova chuan a bial chhunga sorkar sikul hrang hrangah Zirtawpni khan green board leh combo (speaker) a sem.
A bial chhunga sikul hrang hrang hnenah B Lalchhanzova hian Green board hi a vaiin 20 a sem a. Veng hrang hrangah Silpauline bundle 17 sem bawkin, Local Council thenkhat hnenah amplifier a pe bawk.
Zirtawpni vek khan Aizawl East-II bialtu MLA, Minister ni bawk B. Lalchhanzova hian a bial chhunga veng hrang hrang a naupiang thar lawmna thilpek a sem chhuak bawk.
B. Lalchhanzova chuan, “Mizote hian pian pun kan mamawh em em a, nakin lawk ah kan hnam hi a ral mai ang tih a hlauhawm a, pianpun leh fa neih tam kan inzirtir that hle a ngai,” a ti a, chutiang atan chuan he naupiang lawmpuina pawh hi buatsaih a nih thu a sawi.
Aizawl East- II huamchhungah hian kum 1-ah naupiang lawmpuina thil pek tum hnih sem thin a ni a. Naupiang lawmpuina atan hian Rs 1,000 leh thuziak pek thin a ni.
Naupiang lawmpuina thil pek hi December 1, 2024 – June 30, 2025 inkar a piang 157 hnehah pek tur a ni. December 4, 2023 – November 30, 2024 inkara piang 301-te hnenah he lawmpuina hi pek a lo ni tawh a, a vaiin nau piang 458 hnenah naupiang lawmpuina hi a pe tawh a ni.