Kan ramah rel service tak tak a lo thleng ta a. Nitinin pawnlam atangin mikhual hi an lo lut mup mup chho tan ta. A hma pawhin an lo lut tho alawm kan ti mai thei. Mahse rel vawikhat lo thlengin mihring a phurh tam theihzia ngaihtuah chuan a hma ang nen chuan khaikhin rual a ni lovang. Rel lo thleng hi tunhma a sumdawng leh hnathawk tur lo lut ang kha ni ngawt tawh lovin, kan ram hmuh chak vang leh kal a awlsam tak avanga lo zin tam tak an awm bawk dawn.
Hetiang hi kan nih avangin leh kan ram chu hnam tlemte, chimral tham lek kan nih avanga humhalh ngai kan la nih reng tho avangin kan mikhual te hi kan vil uluk an ngai lehzual dawn a. Lo lut se kan tih rualin min chim ral theihna laka kan dan neih Inner Line Permit system hi a hma aiin kan uluk lehzual a ngai ta a ni. Inner line permit pek hi a har lova. Online pawha dila pek mai theih a ni a. A hmaa dil lo pawhin kan ram an lo luhin a dil chawp theiin pek nghal theih a ni. Mahse, dan phal chin awm a ni a, chu dan chu ka lekkawh thiam hle a ngai a. Dan in a phal anga lo lut hi kan ram chhungah dan phal bakin an cham thei a. Heng venna lakah kan sorkar a khauh a ngai. Sorkar hian a vil vek zo lo thei. Mipui lam hian kan dan hi sorkar lekkawh tur ngawta kan dah chuan a pawi thei a. NGO lam support pawh an mamawh dawn hle a ni.
Eng anga dan tha pawh hi nei ila mipui support tel lo chuan a kal theih tak tak lova. Mipuite hian kan himna dan hi kan tan liau liau a ni tih kan thinlunga kan hriat reng a ngai a. A bawhchhia pawh a hektu a kan tan vek ngam a ngai. Dan loa lo lutte hi kan hmelhriat leh eizawnna lama kan thurualpui pawh an ni mai thei. A tua pawh nise dan hnuaia thil ti tura hrilh hram hramtuah kan tan vek a ngai.
Sawi tawh thin angin he hnam hi rei lote a chimral vek tham lek kan ni. Chimral nih kan hlau a. Kan chhehvel state ah te keimahni ang tho a hnam anga lo awm thin, vawiin nia mahni rama hnam dang hnuaia kun ta te kan hmu reng a. An dinhmun anga awm ve kan hlau ngawih ngawih a. He ramah hian Mizo tak leh hlim taka awm zel kan duh a. Chimral kan nih chuan kum reiloteah kan thlahte chuan vawiin nia mizote hi anchhia min la lawh ngei ang. Kan ram hi kan hmangaih a, mizo hnam hi la kal zel se kan tih chuan englai pawhin kan himna kan zawn reng a ngai tih hi in hrilh nawn mawlh mawlh a ngai a ni. Tun dinhmunah chuan kan himna kulhpui ILP hi kan thunawn ni mawlh rawlh se.