Chief Minister Lalduhoma’n India-in kum 2036-a Olympic thleng tura hma a lakna kal mekah India aiawh thei tur Mizo thalai tam tak zawng chhuak turin Empowering Mizoram Sports (EMS) kalpui mek a ni tih a sawi.
Inrinnia Mizoram Rifles Association-in an thlen, 12th North East Championship Shooting Championship, 2025 kharna inkhawm, Thara Resorts, Falkland Vengah buatsaih a hmanpuinaah Chief Minister Lalduhoma chuan Mizoram-in Vision 2036 a kalpui mek tih sawiin, India chuan kum 2036 Olympic khi thlen tumin hma a la mek a, Prime Minister Narendra Modi pawhin a puang tawh a. He olympic lo thleng turah hian India ram aiawh thei tur Mizo thalai tam tak neih an duh a, naupang talent nei thate zawn chhuah a, training tha pek tumin Empowering Mizoram Sports (EMS) chu an kalpui mek tih a sawi.
Chief minister chuan silai kah chu Olympic sports discipline zinga mi a nih avangin talent nei, chher tlak an neih phawt chuan EMS hnuaiah chher theih a nih thu a sawi bawk.
Kharna inkhawmah hian khualzahawm Kalukesh Narayan Singh Deo, President, National Rifles Association of India, Organising Chairman Lalthansanga, Forest Minister leh Peter Zohmangaiha, Competition Director, General Secretary, Mizoram Rifles Association te’n thu an sawi.
Mizoramin he championship a thlen tum thumna a ni a, shooter 257-te chu state hrang hrang paruk leh services atanga telin, Assam atanga tel an tam ber a. Aizawl khawpui chhung hmun hrang hrangah category milin an intihsiak a ni. A pum puiah Mizoram chuan gold medal 25 lain team champion a ni a, Meghalaya chuan gold 24 lain pahnihna an ni.