Nepal Prime Minister Sushila Karki-i chuan mipuiin lungawi lohna nasa tak lantira an parliament thiah a nih hnu ni thumah a minister tur pathum a ruat fel ta.
Karki-i hi Himalaya tlang dung rama hmeichhe hruaitu hmasa ber niin Zirtawpni khan lak luh a ni a. Om Prakash Aryal chu home minister, Rameshwar Prasad Khanal-a finance minister leh Kulman Ghising-a energy minister atan Thawhtanni khan lak luh an ni.
Aryal-a hi human rights lawyer niin vantlang thatna turin dan hmangin a lo bei fo tawh thin a. Khanal-a hi finance secretary hlui niin tun hnaia an ram eibar kalphung siam thatna tura rawtna siamtu a ni a. Ghising-a hi sorkar power utility chief hlui niin an rama inênchhawk nasa lutuk a tihtawp avanga fak hlawh a ni.
Mipuiin an hal chhiat president pisa tualah President Ramchandra Paudel-a’n minister thar pathumte hi a la lut a ni.
Ei ruk an duh lohna avanga an ram mipuite hriat hlawh tak pathum hian Karki-i kaihhruai sorkar lailawk, ei rukna tihtawp tuma intiam hovin ram an hruai dawn a. Thla ruk chhung, March thla tir hmain inthlanpui an huaihawt bawk ang.
Minister tharte hi kar hmasa Thawhtannia mipuiin lungawi lohna nasa tak lantira police-in mi eng emaw zat an kah hlum hnua hruaitu hlun tak, KP Sharma Oli-a prime minister atanga a bân hnuah lak luh an ni.
Gen Z tia invuahten sorkar hotu lawkte ei rukna nasa lutuk nia an sawi duh lohna hi a nasa hle a, mipuiin parliament telin sorkar hmun pawimawh tak tak an hal a ni.
Sorkarin social media platform 26 a khap duh lohna lantira September 8 atanga bul tanin khapna hlih nghal ni mah se mipui hian ei rukna duh lohna lantir zuiin boruak lian tak a awm zui ta a ni.
Nepalese thuneitute chuan mi 72 thi an awm niin Pathianni khan an sawi.
Thalai rualten Karki-i hi an ram hruaitu lailawk atan an rawt a. Kum 73 mi hi an ram chief justice hlui niin Zirtawpni khan prime minister atan lak luh a ni.
Vantlang hmaa a inlan hmasak ber, Pathianni khan an ram tun din leh nan an tanho a ngai tih sawiin ‘Gen Z-te duh angin ram a hruai dawn’ tih a sawi bawk.
“He pawlin a duh chu ei rukna tihbo, rorelna tha leh eibara intluktlanna a ni,” a ti.