Indian Air Force (IAF) chuan hmarchhakah liantham taka nunchan zir an tum mek a, Operation Sindoor hnua hmarchhak biala a hmasa ber tur a ni.
Notice to Airmen (NOTAM) chhuah a ni tawh a, ni 22 chhung, September 25 chawhnu dar 02:00 atanga October 16 tlai dar 06:29 thleng van boruakah tiam chin neiin an che dawn a ni.
Nunchan an zirna tur hi Assam, Arunachal Pradesh, Nagaland leh Manipur-a hmun ngaihven ngai bik chung van sangah a ni dawn a. Bhutan leh Myanmar bul hnai bakah China nena ramria an intihbuai fona hnaih takte pawh an thleng dawn a ni.
Defence-in a tar lan dan chuan nunchan zirna lian tak hi Siliguri Corridor an tih, India ram ril leh hmarchhak bial inthlun zawmna, ‘Chicken’s Neck’ tia an sawi, km 22 leka zau chu an thlur bing zual dawn a ni.
He corridor hi hmun pawimawh tak niin hmarchhaka mihring maktaduai 50 dawn leh India ram ril zawk inthlun zawmna a ni a. Hei bakah hian thenawm ram nena innghirnghona a chhuahna, Doklam leh Tawang bul hnai a ni bawk a, tun hnaiah pawh India-China inkara boruak lian a awmna hmun a ni.
IAF hotu sang pakhat chuan, “Nunchan zirin a tum ber chu kawng hrang hranga a huhova beihpui thlak a tul huna inpeihna atan a ni,” a ti a. Nunchan zirnaah hian van sang atanga lei lama chet dan, air defence system chelek leh air base pawimawh tak taka thlawhna awmte chettir dan te pawh a tel dawn tih a sawi a. Hasimara Air Base-a Rafale fighter squadron pawh an tel dawn thu a sawi.
IAF-in hmarchhaka nunchan a zir tur hi India-in khawchhak lama sipai a dahte tihchak tuma hma a lak mekna zel a ni a. Hmarchhaka ramri vengtu, Trishakti Corps pawh tun hnaiah nasa taka thuam chak an ni a, hmanraw changkang zawk leh van sang venna hmanraw tha zawk pawh chhawp thar an ni.
Operation Sindoor kalpui mek zelah nunchan zir tur hi IAF-in ramri pawimawh zual laiah chuan inring rengin a awm tih alantirna a ni pakhat a. Venhimna lama mi thiamte chuan India-in khawvela ram hrang hrangte inkungkaih dan inthlak mek zel karah mahni himna a ngaih pawimawhzia a tihlanna niah an ngai.
IAF hian a khât tawkin hmarchhakah hian nunchan a zir thin a, kuminah hian ramri-ah neuh neuh awm thei a nih avangin hma a la nasa zual a, a bikin Line of Actual Control (LAC) hrula Chinese sipai chet velna a tam zual a ni.