Andre Onana chuan Turkish Tranzonspor chu loan-in a zawm a, a club thar chu nuam a tih nghal thu sawiin, mipui hnen atanga hmangaihna a dawn ang chu a la tawn ngai loh hial thu a sawi.
Manchester United chuan an goalkeeper hi 2025-26 season tawp thlengin Trabzonspor hnenah loan-in an kaltir a, club thar tan pawh a inlan tawh a, a che chhe lem lo hle bawk.
Coach Ruben Amorim-a chuan Cameroon goalkeeper ai hian Turkish Altay Bayindir a thlan bakah Sean Lammens chu £ maktaduai 18.2-in an lei thar bawk a, hei vang hian Onana hi Turkey-ah hian an kaltir a ni.
Turkey a pan hnuah Onana chuan, “Ka hlim khawp mai a, lawm tak ka ni. Tunah chuan zin kawng thar ka zawh a, chona thar ka hmachhawn dawn a. He lai hmuna ka awm thei hi lawmawm ka ti tak zet a. Ka hlim veng veng mai a, mipui min lo dawnsawn dan ka hmuh hian hetiang hmangaihna hi ka la tawng ngai lo tih min hriat chhuahtir,” a ti.
“A tir atanga tlangnel leh ngampa taka min lo siam nghal thei hi nuam ka ti em em a. Hna thawh tan nghal vat vat ka duh a, min lo hmangaihna hi khelmualah chetziaa rulh let ngei ka duh a. Chutiang ti tur chuan ka inpeih reng a. Player chuan a tam thei ang ber inkhelh kan duh vek a, inkhel pawimawha tel thei nih kan duh hle thin,” a ti bawk.
Kum 2023 khan Manchester United hian Onana hi Inter Milan atangin £ maktaduai 47.2 sengin Old Trafford-ah an seng lut a. United a zawm hnuah chetsual a nei leh thin a, beisei a phak loh chhoh em avangin Amorim pawhin a chhawr tam duh loh phah.
Turkey-ah bul tan thatna hun a nei hlauh a, Cameroon tan 2026 World Cup khel thei tura chet fuh a pawimawh hle dawn a ni.