September 17 hi Prime Minister Narendra Modi pianchampha a ni a. A lawm nan BJP thalai (Yuva Morcha) chuan ram pum huapin Marathon Race a buatsaih dawn.
Marathon Race buatsaih tur chungchang hi nimin khan State Yuva Morcha President Robinson Malsawmtluanga Hmar chuan Aizawl Press Club-ah sawi fiahin PM Modi piancham lawm nana buatsaih tur hi BJP-in an ngai pawimawh tih sawiin, an buatsaih chhan ber chu PM Modi-a kaihhruaina hnuaiah mi retheite leh hnam hnuaihnung zawkte dinhmun thaa chawikan an nih vang tih a sawi.
Robinson Malsawmtluanga Hmar chuan, “Kum danga kan lo tih tawh thin angin, Pu Modi-a piancham (September 17) leh Pu Gandhi-a piancham (October 2) inkarah hian ‘Seva Pakhwada,’ mi dang tana luanchhuahna hun kan buatsaih leh dawn a ni,” a ti.
Marathon-ah hian India puma thalai nuai chuangte tlan tura ruahman niin ram pumah September 21, 2025-a buatsaih tum a ni a, he ni hi Pathianni a nih avangin Mizoramah chuan September 20-ah buatsaih tum a nih thu leh a duh apiang tan tel theih a nih thu a sawi bawk.
Robinson chuan marathon race hi Bawngkawn atangin Ramhlun veng lam kawngah tlanin Lammual thleng tlan turin ruahman a nih thu leh a tlan zawng zawngin certificate leh T-shirt an dawng vek dawn bawk a. Pakhatnain Rs. 10,000 (Medal + Certificate), pahnihnain Rs. 7,000 (Medal + Certificate) leh pathumnain Rs. 5,000 (Medal + Certificate) an dawn bawk baka top 10-a lang phate chuan ‘consolation prize’ an dawng vek dawn tih a sawi.