International Organization for Migration (IOM) chuan Sudanese raltlan 75-te chuanna lawng chu Pathianni khan Libyan tuipui kamah kangin mi 50 vel an thi niin a sawi.
UN migration agency hian Thawhlehni khan dama chhuak mi 24-te mamawh damdawite pek a ni tih a puang bawk.
“Hetianga tuipuia chhiatna lian tak thleng thin hi rang taka ngaihvena tih dan tur ngaihtuah a ngai hle a ni,” tiin IOM hnuaia Libya chapter chuan X-ah an tar lang.
Thla hmasa khan Yemen tuipui kamah raltlan leh pem tum mi 68 chuanna lawng chesualin tam tak an thi a, eng emaw zat chin hriat lohvin an awm tawh bawk tih IOM chuan a sawi.
IOM-in a chhinchhiah dan chuan nikum khan Mediterranean Sea-ah raltlan leh pem tum mi 2,452 zet thi leh chin hriat loh an awm a, khawvela raltlante tlanchhiatna kawng hlauhawm ber a ni hial a ni.
Libya hi kum 2011-a an hruaitu, Muammar Gaddafi-a paih thlak a nih hnuah khan an thenawm ram atanga Europe-a pem tum leh tlanchhiat tumten an chawlh lailawk nana an hman tam ber a ni mek.
Gaddafi-a rorelna hnuaiah kha chuan African pem kual thinte hi tuialhtheia hausa ramah hian inhlawhna an nei mai thin a. Paih thlak a nih hnuah erawh Africa hmar lamah ramah hian hel tam tak chhuakin an inbei nasa a, ram a ralmuang tawh lo hle a ni.
Libya hi pem 8,67,055 awm mekna ram a ni.