Khawvel hmasawnna kan thlir a. Kum za tam tak ata tawha hma lo sawn em em, finna kawng thui tak lo zawh, khawvel thiamna hi a vawrtawp an thleng tawh ang a tih khawpa hmasawn tawhte awmdan leh an chanchin pawh an zarah ka hmetchhuak in kan thlir ve thei ta zung zung mai. Kan rilruah chu ngawt mai chu kan ngaihtuah a. Miin eng ang chanchin nge an lo neih tawh, eng angin nge an pi leh puten hna an lo thawh thin, eng hun lai atanga an hmasawnna leh ropuina chu lo kalpui tawh nge tih erawh kan chhut chuang lova. Mimawl mahni dinhmun hre loa mi thil neih chauh thlir a awt ve ngawt te hi kan ang thin.
Chutih laiin kan rilru a kan ngaihtuahna hre ranin kan ram hruaitute chuan a taka tihlawhtlin hleih theih loh, kan sum leh pai neihin a tlin hauh loh duhthusam leh an chhun mumang chu min han barh ta thin a. Naupang inkhualtelem hi kan ang ber mai.
Kan sorkar kaltaah khan mimawl ngaihtuahna pawhin a tih theih loh tih tur kawngchhawng, field chhawng, etc min han sawi khum chiam chiam a. Lengpui Airport cheithat ringawt pawh uar em em in airport cute ber kan siam dawn an han ti a. Mipui pawh beidawngin kan nui ringawt thin anih kha. Chutih mek laiin vawiin nia kan chief minister lah chuan khawpui thar din turin a duhthusam ram a rawn puah pui ve leh ta thung. Khawpui tharte hi chuti mai maia din theih a ni lova. Khawpui tak tak ni tur leh buatsaih tur chuan a panna kalkawng, airport a bulah, khawpui chawmna tur tui, etc thil ngai hmasa a tam lutuk. Heng zawng zawng vawilehkhata tih theih loh hi thil hmin sa sawiin a han sawi ve leh hmiah hmiah mai bawk. Thil hlawhtling lo tur ngaihtuah leh mumang ram ringawt buaipuitute hi sapho chuan dreamer an lo ti a. An nuihzat huangah an khung a ni.
Ram hruaitute hi chuan an ngaihtuahna hi a tak a thleng thei em, mipuite hnena sawihmuh tur chi a ni em tihte hi an chhut reng a ngai a. Mi ram chuan thil inhmachhawp chho an ngaihtuah a. Khawpui din tura ngai hmasa an vei hmasa thin. Vawiin nia kan chaw lakluhna kawngpui pakhat pawh enkawl hlei thei lovina khawpui thar din han sawite hi a nuihzatthlak zawk a. An duhthusam/ chhun mumang ringawt a ram kaihhruai an tum chuan a tawpah mipui lungawi lohna nasa tak a thleng thei. Hei hi tunhnai lawkah pawh Nepal ramah kan hmuh kha. Nepal buaina kha thil thleng thut a ni lova. Hun rei tak ata tawh lungawi lohna inphum ru a ni. Kan ram hruaitute laka kan rilru hi a lo chhe viau ve tawh thei tlat.
Ram hmasawn kan tihte hi hruaitu tha, thinlunga ram leh hnam hmangaihna nei tlat, hmachhawp fel tak nei an ni thin. Duh duh sawi ringawt an ni ngai lo tihte pawh hi hre tel ila. A tlachawp a tawng zung zung ching ho hi kan ram hmelma, hnawl ngai an ni tih hre nawn fo teh ang u.