Pawngsual leh mawi lo taka hmeichhe rikrap thubuai awrh mek, Thomas Partey chuan thiam lohna a neih loh thu a sawi.
A thubuai chungchang hi February, 2022 atanga chhui tan tawh kha niin, hmeichhe pathumin Ghanaian midfielder lakah hian puhna thubuai an ziak lut.
Hmeichhe pathumte hian a hran theuhin thubuai an ziak lut a, kum 2021 leh 2022 inkara thil thleng niin an sawi a, Partey hi Arsenal tana a khelh lai a ni.
Nilaini khan Partey chu Southwark Crown Court-ah a inlan a, nakkum November 2-ah thubuai ngaihtuah chhunzawm leh tur a ni.
Thubuai a neih chhung hian Partey hi a inkhel thei dawn tho a, hetih lai hian ram danga a zin chhuak dawn a nih chuan a zin hma darkar 24 chhungin police hnenah a inhriattir hmasak zel a ngai a. Amah puhtute hi engti kawng maha a biakpawh phal a ni lo bawk.
Arsenal-a a contract a zawh hnuin kum 32 mi, Partey hian Spanish club Villarreal a zawm a, Thawhlehni zana Champions League match-ah Tottenham an hneh loh tum pawh khan a inlan nghe nghe.
Thubuai a neih hnuah Partey hi England-ah a inkhel leh tawh lo a, Tottenham an hmachhawn kha inelnaa a inlan lehna hmasa ber a ni chauh.
August 5 khan Westminster Magistrates’ Court-ah Partey hi a inlan a, bail phalsak a ni a, hemi hnu ni hnihah Spanish club hi man awm lovin a zawm zui a, kum khat atan contract ziakin thla 12 dang pawhsei theihna ziah tel a ni bawk.
Kum 2020 khan Partey hian Atletico Madrid atangin Arsenal a zawm a, an inleina kha € maktaduai 50 a ni a, North London club tan vawi 167 a khel a, Ghana tan vawi 53 a khel tawh bawk a, World Cup 2022-ah pawh khan ram tan a inlan a ni.