Aizawl: Confederation of Indian Industries (CII) buatsaihin nimin khan New Delhi-a Lalit Hotel-ah ‘North East CSR Connect 2025’ hun hman a ni a, LESDE Minister Lalnghinglova Hmar chuan he hun hi khualzahawm niin a hmanpui.
CSR Connect hawnna inkhawmah thu sawiin Lalnghinglova Hmar chuan, “Mizoram chu state lian lo leh mihring tlemna, CSR pawh dawng tam lo tak state a ni. Chutihlaiin Mizoram hi CSR fund hmanna tur tak state kan ni a, mipui kan tlem avangin investment pawh a langsar hma a, awmzia a nei bik thin,” a ti a, kalkhawmte chu CSR hmanga hmasawnna ngelnghet thlen tura Mizoram leh hmar chhak lam hawi turin a sawm.
Lalnghinglova Hmar chuan Mizoramin CSR Cell felfai tak a neih thu leh, chief minister office atanga vil a nih thu a sawi a; Mizorama CSR invest duhte’n awlsam, langtlang leh awmze nei zawka an kalpui theihnan ‘Mizoram CSR Connect’ chu hman theih tura peihfel tep a ni tawh tih a sawi bawk.
Mizoram leh Northeast India-a CII hmalakna hrang hrangte sawiin, Mizoramah ngei CSR Conclave buatsaih turin CII hotute a sawm nghal.
Sports Minister ni bawk Lalnghinglova Hmar chuan Mizoramin sports leh skill development kaihkawp turin ruahmanna thui tak a siam tawh tih a sawi a, chumi hawi zawnga CSR fund-te hmang turin sumdawngte a ngen.
Kumina CSR Connect-ah hian Mizoram atangin MYC Chairman Malsawmzuala Ralte, LESDE Department Director John Tanpuia bakah CSR Cell Mizoram leh MYC atangin official an tel a. Mizorama NGO – Mission Foundation Movement, Goodwill Foundation leh Zo Inspiration aiawhte an tel bawk.