Aizawl: Chief Minister Lalduhoma’n nimin khan Mizoram Civil Services Combined Competitive Exam-a tling, Administrative Training Institute-a Combined Foundation Course kal mek, MCS, MFAS leh MIS officer-te kawmin, ruling mi leh sa an nihna changchawia thil dik lo tihtir tumtu chu hlau lo tura chahin, an hum tur thu a sawi.
CM Conference Hall-ah an inkawmnaah Chief Minister chuan service hrang hrangte a huhova training an nei chu an zingah innelna leh inhriatthiamna thuk tak a siam dawn tih sawiin, ramin a hlawkpui dawn tih a sawi a. Reilote chhungin Mizoramah service inelna a nasa lutuk tur a hmuh thu leh he inelna tha lo hi tihbo an duh a, anni pawhin chhawm lut lo turin a chah.
Lalduhoma chuan officer ten an hnuaia thawk, staff hniam zawkte hamthatna ngaihsak se a duh thu pawh a sawi a. Thawktu hniam lama indaih lohna nasa lutuk tihziaawm tul an tih thute pawh sawiin, “Sorkar hnathawk chuan, mipuiten ram rorelna an pekte apiang hi tha tak leh rinawm takin thlawp ila, hmasawnna hnathawh a chakin a kal tluang thin. Chutihrualin, tutn emaw ruling mi leh sa an nihna changchawia thil dik lo tihtir che u an tum a nih chuan lo hlau suh u. Kan hum ang che u,” tiin a chah.