CSS hnuaia thawk intelkhawm, All Mizoram CSS Employees Coordination Committee (AMCECC)-in sorkara an thil ngiat nawr nan tiam chin awm lovin lungawi lohna lantir an chhunzawm dawn a. Nimin thleng khan an la chawlh avangin sikul tam takah zirna kalpui theih a ni lo.
AMCECC chuan an thil phutte tihhlawhtling tura sorkar an ngiatna nimin thleng khan sorkar nen an la inbiak loh avangin September 17 atang khan tiam chin awm lovin lungawi lohna an lantir chhunzawm tur thu an sawi a. Mizoram hmun hrang hranga an member-te chu an hnathawhna hmunah tumah kal lo turin an hriattir a. An kal zel dan turah hruaitute thu ngaichang turin an chah a ni.
The Zozam Times zawhna chhangin AMCECC General Secretary Vanlalpeka chuan, Mizoram puma CSS hnathawkten sorkara thil ngiat neia lungawi lohna lantira an chawlh avangin Mizoram chhunga zirna sikul 500 chuangah zirna kalpui theih a nih loh thu a sawi.
Vanlalpeka chuan sikul mai piah lamah khaw hrang hranga Primary Health Centre (PHC) leh Urban Primary Health Centre (UPHC)-ah te, sub-centre-ah te hnathawktu an awm loh thu a sawi a. Civil Hospital, Aizawlah pawh thisen test a khaihlak bakah agriculture department-ah pawh crop digital survey kalpui mek chawlh a nih thu te, UD&PA hnuaia in sak tanpuina pek chhuah theih a nih loh thu leh wildlife guard-te pawh an chawlh vek thu a sawi.
Tar lan tawh angin AMCECC hian April 15-17, 2025 chhungin sorkar laka an thil ngiat nawr nan pen down strike an lo nei tawh a, an thil ngiatte hlawhtlinna an hmuh mai loh avangin September 3-a General Body Meeting chuan nawrh huaihawt relin September 9-11 chhung khan mass casual leave an la a. Thawhlehni khan Mizoram hmun hrang hrangah sit-in demonstration neiin lungawi lohna an lantir leh a ni.
Nimin tlai khan an kal zel dan tur relin an thukhawm a. He chanchin buatsaih lai hian an thuchhuak hriat hman a ni lo.