- Reuben Lalnunthara Hnamte
Bar thla kan lo chuangkai leh reng tawh a, ruah lah chuan kian zai reng alar el si lo. Kei lungmawl hian ka dawn ve mai mai thin a, indona a thlen tam kum hian ruahtui hi a tam em ni ang aw tiin ka ngaihtuah ve thin. Europeah leh middle east lamah indona tawp hlei theilo a thleng reng a, mi sang tam tak mual an liam ta. Khawvel hi indona leh innghirnghonain a khat a, chak zawk leh neih belh tumin ram hausate an hmanhlel a. Mi sang tam tak tan tahna leh tuarna an thlen a, nunau tam tak riltamin an rum a, eitur nei mumal lovin mi tam tak an vakvai a ni. Kan kumhlunna tur ram ni silovah hian eitur, chenna, silhfen kan neih a tul a, thenkhatin hak sen loh, ei senloh leh awm sen lohna tam chenna an neih laiin, a thente erawh eitur, silhfen, chenna tur nei lovin an vakvai bawk a. Khawvel hi chu ava ferlo em tih mai tur a ni; mahse, kan kumhlun tur ram ni mawlh hek lo. Kunhlun loh tur ram nisi hi kan damchhung hi chuan kan cheibawl a, tha taka kan humhalh chu a ngai lawi si. Israel hote phei khu chuan Messia an la nghak a, Messia a lo thlen hunah chuan engkim a rawn chinfel sak ang a, an hmelmate zawng zawng hnehsak a, Israel ram khu chatuana chhe theilo tur a rawn dinthar turin an ngai a, chu hun chu tlumte a thlir takin nghakhlel takin an thlir mek a ni.
Krismas a lo thleng anga, Aizawl pawn atanga rawn awm te chuan an khawlama haw nghakin leh krismas hman hman loh hlauin an phe leh suau suau dawn a ni. Keini haw na tur nei ve lem lo Aizawla piang leh seiliante chuan a hmunah hian kan krismas chu kan hmangral ve leh mai dawn a. A chang chuan mahni khawlama masi hman tuma nghakhlel leh hlimtaka han haw ka hmuh chang hian ka awt ve rum rum thin. Mahse, Aizawl bak khua tih tur ka nei ve mang silova, lunghnur deuha ka inngaihtuah mual mual chang a tam mai. Mahse, enge ka khua ka seilenna a ni miau a, khawnge ka haw chuan ang? Chu chuan ka rilru a ti hahdam leh thin. Khawvel hmun hrang hrangah indona a thlen deuh reng a, mi sing tam tak an ram chhuahsanin inhumhimna zawngin ramdangah an tlanchhia a. Europe ramah te, America ramahte an tlanchhia a. Keini India ram ngei ah pawh Bangladesh lamte, Burma lamte leh Pakistan thlengin raltlan an lolut thin a ni.Keini mizorama awm te ngei pawh 1966 buailai kha chuan Burmaa raltlan a awmhlen ta mi tam tak an awm a ni. Mizoramah pawh raltlan an ran awm ang tih kan rin phak ngailoh, ramdang chungah chauha thleng tura kan ngaih kha kan ramah pawh raltlan sang tam tak kan nei mek a nih hi.
Israel fate ho khu an danglam em emna ni a ka hriat chu – khawvel ramdangah chuan indona alo thlenin an ram atangin ram dangah an tlanchhia a, ramdangin raltlan tam tak an lo mikhual thin. Israelho erawh khu chu an letling hlauh thung. Indona alo thlena an ram beiha awmin ramdangah an tlanchhe ve hauh lo; ramdang atangin an ramah an rawn haw zawk tlat mai khu ni. An ram chhan tur khuan an tangrual em em mai a, hmeichhia leh mipa pawh sawi lovin an ram chhan tur chuan huaisen takin ke an pen ho khu a ni. Ramdanga awmte pawh an ram chhan turin an rawn haw zawk a, an ram tan chuan thih an hlau lova, tuar an huam em em mai a ni. Mizoramah hian Indonate leh harsatna hi lo thleng ve ta se kan tangrual angem tih hi ka ngaihtuah thin. Ramdangah kan raltlan angnge niang a, kan ram chhan nan hian engpawh tuar kan huam angem? Kan hnamah leh kan ramah hian kan chiang meuh em aw tih ka ngaihtuah ve thin a. Tute thlah emaw ni a inhriatna hi mi thenkhatin an nei tlat mai thinte hi a mak thin ngawt mai. MIZO nihnaah hian lungawi hle ila, kan ram kan hnam chawisang tur hian theihtawpin tangrualin bei zawk ila, tichuan mizo hnam hi chawisan alo ni deuh deuh dawn zawk a ni.
Tunah phei chuan kan tanrual lehzual hi a tul takzet a, khawvel hmasawnnain kan ram pawh lo thleng ve zelin Rel station hial kan lo nei ve ta. State dang atangin mizorama lo lut duh mi tam tak an awm dawn a, kan tanrual hle loh chuan chimral kan hnaih mai ang tih a hlauhawm ta. Kan ramri hnaih maia awm cachari kan tihte pawh khu chimralin an awm tawh a, cachari hming chu la pu mahse, neitu nihna an nei tawh lo. Tripura ramte pawh khu Debbuma hnam awp thin leh an ram ni thin kha, tunah chuan Bengali ram a ni deuh thaw tawh. Mizoram pawh hi mizo hming hawh a ram rawn neih te, dawr emaw, company rawn neihte an tum zel dawn. Tunah pawh hian hnamdang dawr Aizawl khawpuia a tam tawh ziate hi han thlir chuan a lungawithlak vak loh. Kan nulate pawh hian kan state pawnlama mite hi chu pasalah hian neih loh hi tum sela a tha ber a, kan nulate hmang pawh hian min chim hle thei tlat. Pathian rawngbawla chanchin tha chu hnamtin hnena kan hrilh mek lai pawh hian kan hnam nihnaah erawh kan chian a, kan humhalh hle erawh a tul a ni. Khawtlang huap leh YMA ang pawh hian kan hnam nihnaa chian a, hnamdang pasal neilo tura inzirna hi chu kan neih nasat a tul lehzual tawh a ni.
Ram changkang zawkte hi an hnam nihnaah hian an lo chiang hle mai a, Europe ramte pawh khu zau hle angin lang mahse an hnamah erawh an chiang hle. Tunah pawh khuan Muslim an tam lutuk tawh a, chu mi duh lo pawl chuan nasa takin kawngzawhin an bei a nih khu. America ram pawh ramdangin an chim nasa lutuk tawh a, Trumpa America hnam tan tlattu a rawn dingchhuak a, sawiselna tam tak karah America chawisang turin a bei a, hnamdang an lo tam tawh lutuk avangin an buai nuaih nuaih ta reng a ni. Trumpa khu nakinah chuan Aemrica hian ala ngaisang hnuhnawh viauin ka ring. Thalaite kan harh angai, kan hnam leh kan ram chawisanga dingchhuak tur hian hma ila ang u. Nepal ram pawh thalai rual an han harh meuh chuan an ram sorkarna an nam thlurup thei a ni. Eiruknate kan do ngam a, kan ram leh hnam dinchhuak tura ke pen a, tun atanga nasal eh zuala kan tan loh chuan kan la rum vawng vawng anga, kan ramah hian vai tawng kan tihte hi tawng tualleng ala ni mai ang tih hi hlauhawm tak a ni. Zofate hi khawnge kan hawn ve dawn? Kan ram zimte Pathianina min pekah ngei hian a ni dawn lawm ni?