Manchester United chu khelmual chhunga che tha lo mah se an sum lak luh a pung nasa hle thung a, nikum chhung khan kum danga an lak luh aia tam an la lut.
United hian anmahni record an khum a, an sum lak luh tam ber kum tawngin khelmual chhungah result tha nei lo mah se, nikum khan hlep £ maktaduai 666.5 lai an nei a ni.
Season liamta khan Manchester United hi Premier League-ah 15-na an ni a, 1973-74 season-a an relegate hnua league-a an chet chhiat ber tum an tawng.
Heti chung hian an sum lak luh erawh a pung zel tho mai a. Snapdragon nen kum nga chhung atan kawr hma sponsorship inremna an nei a, he an inremna hi £ maktaduai 333.3 lai a ni.
Kumin June thla thleng khan inkhelh nia ticket an hralhna atangin kum khat chhungin sum £ maktaduai 160.3 an la lut bawk.
“Hun harsa tak kan tawh lai pawhin heti zat sum kan la lut thei a, hei hian kan club ngelnghehzia a tilang chiang a. Tun season-ah pawh kawng eng kimah hmasawn kan tum chho mek bawk a ni,” tiin United Chief Executive Omar Berrada chuan a sawi.
Kumin January thla khan Deloitte-in rank a siamah Manchester United hi club sum la lut tam zingah palina a ni a, nikum hmasa khan United hian £ maktaduai 651 lai sum an lo la lut a ni.
Real Madrid chuan nikum hmasa khan £ maktaduai 883 an la lut a, Deloitte rank-ah pakhatna niin, Manchester City (£ maktaduai 708) leh Paris St-Germain (£ maktaduai 681) ten an dawt a ni.
Kum hnih liam ta chhungin United chuan an sum hman nasatna tam tak an tihniam a, hnathawk mi 1,100 atangin 700-ah an tihniam a, an ei leh in bakah, Krismas an hman dan thlengin an sum dinhmun siam that nan an inhrek a ni.
Champions League an khelh loh kum a ni a, Premier League-ah pawh an che ropui lo chho zel bawk a. Heti chung hian nakkum June thlaah chuan United hian £ maktaduai 640 atanga £ maktaduai 660 vel sum an la la lut thei dawn tho niin BBC chuan a tar lang.