Aizawl: Higher & Technical Education Minister Dr Vanlalthlana chuan zirlaite chu an ngaihtuahna leh khaw thlir tihhmasawna tihzau nan zirlaibu pawn lam lehkhabu tha chhiar uar tel turin a chah.
Minister Dr Vanlalthlana hian nimin khan Dawrpui Multipurpose Hall-a Govt. Aizawl West College Week kharna hun a hmanpui a. Zirchianna hrang hrangin a tar lan danin, zirlai piah lamah taksa inzawizawina te, infiamna intihsiaknate chu rilru tiharh a, tumruhna siamtu leh puitlin inzirna tha tak a nih thu a sawi.
Zirlaite chu an zirlaiah theihtawp chhuah tur an nih rualin, an ngaihtuahna leh khawthlir tihhmasawn a tihzau nan syllabus pawn lam lehkhabu tha tak takte chhiar uar tel turin Dr Vanlalthlana chuan a chah a. Tuna college zirlaite khawvel hmachhawn tur chu tun hma generation-te nen a inan tawh loh thu sawiin, graduate hnua hna an zawn hunah mahni mihringpui te chauh ni lo vin, hna peng tam takah chuan AI nen an inel a la ngaih chhoh thu te a sawi a. Chumi avang chuan kawng engkimah mahni theuh hma an sawn a, an thlen san theih ber dinhmun luah tum turin zirlaite a chah bawk.