Thangthar thuziaktute zinga ngaihhlut hlawh leh thalaite duh rawn Zirsangkima lehkhabu thar ‘Puanzar Phen’ tih chu September 20, 2025 (Inrinni) chawhnu dar 1:00 khan School Education Directorate Conference Hall, Treasury Square, Aizawlah Dr. Vanlalthlana, Minister chuan a tlangzarh.
Zirsangkima hian lehkhabu pali tichhuak tawhin, thalaite lawm zawng thawnthu lam a ziak thin a, tuna mi a pangana erawh hi chu a hawi zawng dang hlak niin, thawnthu a awm ta lo a, kartin pathianni apianga chhuak thin ZALEN chanchinbu leh nitin chanchinbu The Zozam Times ah columnist niin, heta a thuziakte a dahkhawmna hi a ni a, chhiar a manhla hle.
Lehkhabu tlangzarh inkhawm hi Vanlalrema Vantawl, Editor, ZALEN chuan kaihruaiin, lehkhabu thlirlawkna hun hi Lalvansanga Pautu, Desk Editor, The Zozam Times chuan a nei thung.
Lehkhabu thlirlawkna hmangtu Vansanga chuan Puanzar Phen hi zirlai, nu leh pa, zirtirtute, Pathian thuhriltute zawng zawng bakah entertainer te thlenga chhiar chi leh hriat ngei ngei chi awmna nia a hriat thu a sawi a. A changa fuihna, a changa tumruhna pe thei thuziak awmna nia a hriat thu sawiin, Zira lehkhabu pangana hi lei a, chhiar a, nunpui chi nia a hriat thu leh, vawi tam chhiar chi, Mizote mamawh awmna a nih thu a sawi.
Lehkhabu tlangzarhtu Minister Mathlantea chuan, Zirsangkima lehkhabu ziah ang chu a ngaihsan chi, Mizoten kan chhiar tam ngai chi nia a hriat thu sawiin, heti lam hawi ziak zel tura a duhsak thu a sawi bawk.
Zirsangkima lehkhabu thar hi lehkhabu dawr hrang hrang leh zuarchhuak ho hnenah lei theihin a awm bawk.