Aizawl: Rev Dr. Vanlal Nghaka Foundation-in Pathian thu zirlai pathum hnenah Inrinni khan scholarship a hlan.
Pathianthu zirlai pathum scholarship an hlan hi Alahabad Bible Seminary-a 2nd Year BD zirlai Emanuel VL Hmangaihzuala; Serampore College-a 1st Year BD zirlai Vanlaltanpuia leh John Roberts Theological College-a 4th Year BD zirlai Vanlalfakzuala te an ni.
Inrinnia ATC Seminar Hall-II a scholarship hlanna inkhawm hi Rev. Dr. Vanlal Nghaka Foundation Chairman, Rev. Dr. K. Lungmuana’n kaihhruaiin, chhungkaw aiawha thusawitu Rev. Dr. Vanlal Nghaka fapa, Dr. Lalmalsawma Nghaka chuan, zaithiamte, film siam thiam leh inkhelh thiamte an chawimawi thin angin Pathian rawngbawltute hian chawimawina hi dawng ve se tih chu an ngaihdan a ni a. Khawsak harsa tak chunga Bible zirte kan puih ve theih nan tiin hetiang ruahmanna hi siam an nih thu a sawi.