Aizawl: Mizoram sorkar leh Opikpure Pvt. Ltd. chuan Khuangleng, Champhai district-a sawhthing sawngbawlna ‘Ginger Processing Unit’ dinna turin inremna thuthlung an ziak.
Inremna thuthlung hi Adviser to chief minister Dr. KC Lalmalsawmzauva pisa-ah Mizoram sorkar aiawhin Pinky Zosangpuii, Joint Secretary, Commerce & Industries Department leh Managing Director, Opikpure Pvt. Ltd. te hming an ziak.
Thuthlung an ziak hi Industrial estate hmun, Khuanglengah kum 10 chhung, sawhthing sawngbawlna din leh kalpuina tur a ni a. Hemi atan hian Opikpure Pvt.Ltd te chuan Industrial Estate ram chu sorkar bituk rate angin, man chawiin an luah hawh dawn bakah thawktu za zela 50 aia tlem lo chu ram chhung mi an ruai dawn a ni.
Tar lan danin, an inbunna tur senso hi Rs vbc. 2.5 vel a ni a, 2026 kum tir lamah hna thawk tan tura inbun fel hman an tum thu an sawi.
MoU sign-naah hian Special Investment Committee for Agriculture & Allied Sector member Maria CT Zuali, Secretary, Horticulture Department, LP Lalchangkima, Managing Director, ZIDCO, C.Lalnunsiami, Sr. Research Officer leh sawm bik angin Dr. H.Lianzela, Director, Commerce & Industries Department-te an tel a ni.