- Dr. C. Lalrampana
April 25, 1979-a
West Phaileng, Mizorama piang, thingtlang naupang, lêngzêm hla leh Pathian hla sa thiam êm êm, Gospel singer & Speaker hial ni tawh; a thiltih apianga hlawhtling chho zel thin Vanlalsailova hi chhungkaw rethei tak an ni thin. An chenna in pawh, lei chhuat, a bang dap, a chung rangva, a ban leh rel thingtuai, ruah a sur changa inchhunga far zawih zawih thin a ni.
Mizo zaithiam zingah ram pawn thlenga hriat hlawh ber pawl, nula tleirawlho pawhin an dopâwn (hnutea) a hming sign-tir hial an châk êm êm thin khawpa lâr, a hunlai rau rauah amah tluka lâr an awm lovang tih hial a tling. Official album pakhat chiah siam hman mah se, a lengzem hla sak a lar êm êm a. Lêngzêm khawvel luhchilh chhunzawm zel ta se, hausa tak ni thei tur, a lar vang lai takin Pathian lam a hawi thut a, Gospel lamah thawm a nei chhunzawm ta zel a. Pathian thusawi lamah pawh tawngkam a hnehsawhin a lo thiam phian mai.
Vanlalsailova hian fans a ngah rualin a style ei lo fe fe pawh an tam hle. A nuna ngaihsanawm tak chu theitawpa tih tak taka beih, hlawhtling tura engpawh thawh huam, leh thlemna karah pawh mahni thutiam hlen chhuahte hi a ni.
Lêngzêm Album: Zoram Tang Fan Fan/Derna Anka tih chu November 7, 2002 khan a chhuah (released) a. Lêngzêm/Lênglâwng a sak leh larpuite chu:
Derna Anka
Hmeltha
I Cham Reng
Ka Dem Lo Che
Ka Hlan Ngam Lo
Khua Hmun Loh Zawng
Lenglerhi
Lung I Her Leh Si
MS I Dawn Chiang Lo
Zofaleng Kan Sawm E
Zoram Tang Fan Fan. tihte a ni.
“Zoram tang fan fan” tih hla phei hi chuan zofate thinlung a hneh hle. Ama thusawi ngei hi tarlang lawk ila: “Mi hlawhtling kan tih tam takte hi hlawhchhamna nasa tak lo tawng tawhtute an ni. Tuarna tel lovin chakna thar a insiam thei lova, chutiangin hlawhchhamna tel lovin hlawhtling tura chona thar thinlungah a piang thei lo.
Ka hring nun hi intihsiakna thinlung pu leh Chona thar hlirin a khat a, Ka khawvela ka mawhphurhna a tla rêng rêngte hi tlawm san ka tum ngai lo. Ka rilru hi ka thuhnuaiah ka dah tlat a tul tih ka hria a, chutilochuan ka natnate hian min bawih vaih chuan ka chan chhiat turzia hi ka hre chiang a ni. Eden huan chhung kha chu a him a, a pawn hi chu a him lo tih ka inhrilh thin. A pawn zawkah ka pian tak miau avangin ka taksa leh rilru tina thei awmna khawvelah ka awm tih ka inpawm bawk.
Na thei taksa hmangin khawvel hi ka thih hma zawng chu ka chamchilh dawn tih ka thinlung hnenah ka hrilh thin a. Pawm turin ka fuih thin.
Mi khawngaih hlawh êng rênga nun hi ka hlauh ber zinga mi a ni. Zahawmna kan chãn vek phah thei si a.
A tawp nan, Heng mi chihnihte hi ka mi huat leh ten berte an ni. Kut tling lo hmanga Hausa a ram hmangaih ber anga lan tum leh siho leh ram mipui chanpual eiruho hi…”
Heti khawpa Pathian rawngbawla inpezo, mahni inthunun thei si hian kum 2023 inthlanpuiah khan khawvel pawlitik lipui a rawn dai ta bawrh mai a. “A thiltih apianga hlawhtling chho zel thin” tih ni si kha MLA atangin a tla chiang hle. Mahse, engkim hrethiama tuar thiam mi a nih avangin a hlawhchhamna hian a nun a khawih chhe lem lo niin a lang. Tun thlengin huaisen takin a dinna ngaiah a la ding reng a ni.
Dampa bial a tlak tawhna bialah bawk bye-election lo awm turah a a ding nawnleh dawn a. Vanlalsailova hian ZPM Party office a thu a sawinaah- “Dampa bial chhung thalaite zingah Sawrkar hna Group – A, B & D etc dil an awm nual tawh, mahse ruling bialah post dah a ni tlangpui thin, MLA ni chiah silo min hmu MLA ve deuh reuh bawk si, Minister hnena thehluh tur ka recommend-na rawn dil fo thin; mahse, thawk fuh thei chiah lote kha, ka tlin phawt chuan a thawk fuh ve tawh ang, kan chang ve tawh ang tih ka sawi duh a ni” a ti.
Ama awmna party mah ni se, thudik tak sawi mi a ni a, kalphung thar Sawrkar kal mek kal dan mipui hriat phak vek si loh thil tam tak a rawn tarlang a, Group A leh B-te phei chu recommend hmanga tlintir chi a ni lova, ZPM Sawrkar hma kha chuan MPSC hnuaiah dik leh felfai taka lak thin niin a lang zawk.
Vanlalsailova hian, MLA a nih huna a chet tum dan leh mipui Sawrkar kal mek dan a rawn sawi fiah hle a, kan Evangelist /Revival speaker-te’n Pulpit atanga an sawi fo thin kha a rawn thual nawn ni berin a lang. Engpawhnise, thusawi ropui leh tha tak a ni. A party puite tan erawh inhailan mualphona a ni thei mai thei! Chuvangin, Mizo Pa huaisen tak a ni tih hi tu hnial rual a ni lo.
Dampa bialah hian kum 2023 khan MNF khan vote 6,218 hmuin ZPM khan 5,926 a hmu a, vote 292 lekin MNF-in hnehna a chang a ni. Tun tumah hian ZPM hian vote 6,000-7,000 vel tal a hmuh loh chuan a hlawhchhamleh mai thei. Ruling party nihna a vanneihpui hlauh erawh chuan hneh takin a tling thei bawk. Engpawhnise, Vanlalsailova hi Mizo Pa huaisen tak a ni a, huaisen taka mahni inrintawkna nena a beih chuan a tling thei a, a bik takin non-Mizo zingah tan a lak nasat lehzual a ngai a ni e.