Chief Minister Lalduhoma chuan Forest Conservation Amendment Act (FCAA), 2023 chungchanga mi thenkhat thil sawi dan chu a dik lo tih a sawi a. Ram tana tha lo tur leh hlauhawm tur chu ZPM party leh sorkarna fawng chelhtute hian an ti hauh lo vang tih rin ngam tur a nih thu a sawi.
Thawhtannia ZPM party pisa-a chhung inkhawm neihah thu sawiin chief minister chuan India hian British siamsak, Indian Forest Act chu kum 1927-ah a nei a. British-ho chu India ramah sumdawng tura lut niin, an duh ber chu India thau sawh a nih avangin India mipui tan leh tribal-te tan he forest act hi a that vak loh avangin India-in zalenna a hmuh hnuah a kutchhuak ngei dan, Conservation of Forest Act hi India sorkarin a siam ve ta tih a sawi a. Hei hi forest humna a ni a, dan tha zawk India sorkarin a rawn siam chu Mizoramah pawh UT a nih atanga hman a nih thu a sawi.
Chief minister chuan he dan hi a tha tawk lova ngaiin kum 1996 khan TN Godavarman chuan Supreme Court-ah a khing a, court thutluknaah chuan community forest te, private leh sorkar ram te, revenue ram te pawh forest tih a lo ni ta a. He dan hmang hian forest ram chhunga hmasawnna hnathawh tur reng rengah phalna (clearance) lak zel a ngai a. Hei vang hian Mizoramah ngei pawh hmasawnna hnathawh turah harsatna an tawk a, he dan hi sorkar laipui pawhin hnawksak a tih avangin dan thar, Conservation of Amendment Act 2023 hi an siam ta tih a sawi.
Dan thar siam a nih lai, MNF sorkar lai khan guidelines leh rules an la hmuh loh avangin dan ringawt thlir khan an inhlauhsiak ta a, a pawi tiin zirchianna a la awm lo nen resolution-te pass-in an do a. Amaherawhchu, guideline-te a rawn chhuak a, an zirchiang a, he dan hi an mamawh zawk niin an hria a, house-ah lungrual takin an pass a. Assembly speaker-in, ‘Remti loin awm em?’ a tih khan tumahin, ‘Remti lo,’ ti an awm loh avangin dawhkan beng chungin an pass ta tih chief minister chuan a sawi bawk.
Lalduhoma chuan he dan an hlauh chhan ber nia lang, international border atanga km 100 huam chhunga forest clearance lak harsa lutuk hi a awm tawh tur a ni tih a ni a. Hetih rual hian km 100 bial chu an phalrai ngawt lo va, linear project an tih heng kawngpui, rel kawng, gas & oil pipeline, power transmission line leh strategic security & public utility vantlangin an mamawh thil te a ni a. Hengah hian hma an la a nih pawhin an hnathawhna chin bak kha ram pek an ngai lo va, khing hmalaknate khi mipuiin ni tina an chhawr leh an mamawh ngawih ngawih an ni a. Indo a thleng lo a nih chuan he danin a phalsak china hmasawnna hnathawhte hi a chhawrtu tak tak tur chu mipuite an ni a, indo a lo thleng palh ta a nih pawhin emergency an puang ang a, an duh duhin an tidanglam dawn tho tih a sawi.
Chief minister chuan central sorkar an ngai sual lutuk chu a dik lo va, a pawng a taka tihchhiat tuma hma an la tur anga mi thenkhatin an sawite hi a dik lo va, Mizoram thatna tur zawka ruahman a ni tih a sawiin, “Article 371 G-ah pawh kan himna a awm bawk. Kan ram tana tha lo tur leh hlauhawm tur chu ZPM party leh a sorkarna fawng chelhtute hian kan ti hauh lo vang tih ring ngam ang u, hlauh kan inzirtir nasa lutuk hi a pawi em em a, hlauh tur dik tak Pathian hi a hlau ber ang u,” a ti.