Paris St-Germain forward Ousmane Dembele chuan French treble a nihpui rualin a vawi khat nan Ballon d’Or a dawng.
Paris khawpuia Thawhtanni zana chawimawina sem inkhawmah kum 28 mi hi chawimawina hlan a ni a. France forward hian season liam taah vawi 53 a inkhelhah goal 35 thunin mi dang thun tur vawi 14 a siamsak a, PSG chu Champions League, league nomawi leh French Cup a lakpui.
Ligue 1-ah goal 21 thunin thun tam ber pahnih zingah a tel a, French league sang beah hian player tha bera thlan a nih bakah Champions League player of the year a ni tawh bawk.
PSG hi Club World Cup final luhpuiin New Jersey-ah Chelsea an hneh lo.
Chawimawina dawng tura Barcelona rawlthar, Lamine Yamal khumtu hi a team inkhel mah se Paris-ah hian hliam neia a chawlh lai a nih avangin a inlan a, mittui nen chawimawina hi a dawng.
“Ka thil tawn hi a ropui lutuk a, PSG nena kan tawn hi sawi ngaihna pawh a awm lo,” tiin dawhsana a nuin a tawiawm laiin a sawi.
“He chawimawina hi awlsam taka dawn theih a ni lo va, football legend Ronaldinho-a’n min hlan hi a ripui lehzual a ni,” a ti.
“Kum 2023-a min latu PSG chungah ka lawm a, chhungkaw ropui tak a ni a. President Nasser (Al-Khelaifi) hi ka pa ang mai a ni a, thawktu leh coach zawng zawng, tha taka min enkawltute leh ka khelhpuite chungah ka lawm bawk,” a ti.
“A huhovin kan zavaiin hnehna kan chang a, hun harsaah pawh min tan tlat zel a. He mi mal chawimawina hi a huhova kan thawh chhuah a ni,” a ti.
Coach of the year chawimawina dawngtu, PSG manager Luis Enrique chu Dembele-a’n chawimawina a dawn chhan lian tak a ni tel a. December thla laihawl khan a khelhna a thlaksak.
Ding lam atangin Dembele hi centre-forward-ah Lyon an hmachhawn tumin December 15-ah a sawn a, hetih lai hian goal nga chauh a la thun.
Heta tang hian PSG tan goal 30 a thun zui ta a ni.
Borussia Dortmund atanga kum 2017-a Barcelona-in £ maktaduai 96.8-a leia £ maktaduai 135.5 thleng pek tur an inhuamna chu a tihlawhtling mek a ni.
Team of the year dawngtu PSG hian kum 2023 khan £ maktaduai 43.5 chauhvin an lei a, an tifuh zui ta a ni.
Dembele hian 2024-25 chhungin France tan vawi sarih inlanin goal hnih a thun bawk.
Frenchman zinga he chawimawina dawng thei parukna niin kum 2-22-a Karim Benzema-a’n a danw hnua kum sangbi 21-na hnua dawng thei pahnihna a ni bawk.
Kum 18 mi, Lamine Yamal chu pahnihna niin best young player-ah thlan a ni tho va, Kopa Trophy a dawng.
Ballon d’Or 2025-a a sang zual 10 zinga panga hi PSG player niin Vitinha (pathumna), Achraf Hakimi (parukna), Gianluigi Donnarumma (pakuana) leh Nuno Mendes (10-na) an ni.
Liverpool forward Mohamed Salah chu palina niin Chelsea leh England forward Cole Palmer chu pariatnaah a awm bawk.
Nikuma mipa player tha ber chawimawina dawngtu, Manchester City leh Spain midfielder Rodri-a chu kuminah hian shortlist-ah a tel lo va, na taka a inhliam avangin season hmasaah a khel mumal lo a ni.
- Arsenal striker Viktor Gyokeres chuan 2024-25 chhunga vawi 52 khelhah goal 54 thunin European football-a thun tam ber niin Gerd Muller Trophy a dawng.
- Lamine Yamal chuan rawlthar player tha ber chawimawina, Kopa Trophy chu a vawi hnih nan a dawng.
- 2024-25 chhunga PSG nomawi pathum lakpuitu, Luis Enrique chu coach of the year a ni.
- Italy goalkeeper, Manchester City-a khelh mek, Gianluigi Donnarumma chu PSG tana a chet that avangin best goalkeeper-ah thlan a ni a. Kum 26 mi hian vawi 47 khelhah goal chhuah loh vawi 17 a nei.