Aizawl: Alzheimer & Related Disorders Society of India (ARDSI), Mizoram Chapter buatsaih ‘World Alzheimer’s Day, 2025’ chu Thawhlehni khan hman a ni.
Chanmari YMA Hall-ah hun hmanah Social Welfare minister Lalrinpuii chuan khuallian niin a hmanpui a. Tunlai khawvelah mihring dam hun chhung rei tial tialin, kum upate pawh an pun zel thu leh natna chi hrang hrangin a tlakbuak thin thu a sawi a. Kum upate’n natna an vei zinga enkawl leh buaipui ngai em em pakhat chu Alzheimer a nih thu leh he natna veite enkawlnaah chhungkua, thenawm khawveng leh kawtlang hriatthiamna leh intawiawm tawnna a pawimawh thu a sawi.
Social Welfare minister chuan World Alzheimer’s Day an hman hian Alzheimer chungchang hriatna zau zawk te, a hun taka natna hmuh chhuah leh he natna veite enkawlna tha zawk a thlen ngei a beisei thu a sawi a. Alzheimer hi cancer leh natna dang anga natna chi khat, thluaksawngnatna a nih thu leh he natna veite hi enhrang mai lova khawtlang leh mipuiin an hriatthiam a pawimawh thu a sawi.
Lalrinpuii chuan NITI Aayog leh ARDSI-te Alzheimer veite enkawlna kawngah an thawhho thu leh Mizoram sorkarin Article 275(1) hnuaiah Alzheimer’s Home a sak mek thu a sawi bawk.
Inkhawm hi Dr. Robert L. Khawlhring, Vice President, ARDSI Mizoram Chapter in a kaihruai a. Prof H. K. Laldinpuii Fente-in thupui a sawi hawng a. Dr. Daniel Chianghnuna, Secretary, ARDSI Mizoram chuan lawmthu sawiin hun a khar.
He hunah hian Alzheimer chungchang slogan/poster presentation intihsiakna lawmman pakhatna dawngtu Rudrani Borah, ZMCH; pahnihna R.no 71-80, 2022 batch ZMCH leh pathumna Kavita, ZMCH te hnenah minister chuan lawmman a sem a ni.