Aizawl: Mizote tana eizawnna leh thiamna lama hmasawnna tur chungchang sawi hona, ‘Rountable on Employment, Skills & Social Protection’ chu ATI Auditorium, MINECO, Aizawl-ah Thawhlehni khan neih a ni a. He hun hi LESDE Minister Lalnghinglova Hmar-in a hmanpui.
He hunah thu sawiin LESDE Minister Lalnghinglova Hmar chuan khawvela pawl pawimawh berte zinga mi, lehkhabu leh zirlaibuahte chauha an lo hmuh thin, International Labour Organization (ULO) te nena Mizoram hmasawnna ngaihtuaha, thawk ho thei tur leh thu sawi ho theihna hun lo thleng chu lawmawm a tih thu a sawi.
Minister chuan Mizorama eizawnna kawnga harsatna hrang hrangte, sorkar hna indaihlohna avanga mi thiam tak tak ten hna ngelnghet lo, informal sector-a an thawh nasat thu te, ram danga eizawnna zawnga an vah chhuah nasat thu leh chung mite tana innghahna tlak hna, him leh kumhlun tur ngaihtuah a pawimawh thu sawiin, ILO te nena thawh hona hian rah duhawm tak a chhuah zel a beisei thu a sawi.
ILO Deputy Director Satoshi Sasaki pawhin thu sawiin thiamna, hmasawnna leh eizawnna kawngahte Mizo thalai ten theihna nasa tak an neih ngei a rin thu sawiin, ILO chu Mizorama mi rethei leh mi te berte thlengphak hmasawnna thlen tura an thiamna leh theihnate hlanchhawng tura a inhawn reng tur thu a sawi bawk.
‘Roundtable Discussion’ hi LESDE Department leh International Labour Organization (ILO) tangkawpin an buatsaih a ni.