Aizawl: NHIDCL hotute hnenah Aizawl leh Vairengte inkar kawngpui chu ngaih pawimawh bika nei turin Chief Minister Lalduhoma’n a chah.
Chief Minister Lalduhoma leh NHIDCL hotute chu nimin khan CM Conference Hall-ah an inkawm a, Mizorama NHIDCL ten kawngpui an sial mekte an thlir let.
An inkawmnaah chief minister chuan national highway-te thawm that ngai a tam leh tawh a. Lirthei tana tlan harsa khawpa chhia a tam leh tawh hle. Contractor Liability Period chhunga mi vek an la nih angin rang taka thawm that thuai a duh thu NHIDCL hotute hi a hrilh a. Bypass Road kawng thar an laih hnua khaw chhung kawngpui, state PWD hnena an la hlan loh te a rang lama hlan tur te, Aizawl leh Vairengte inkar kawngpui chu ngaihpawimawh bika nei turin a chah.
Chief minster chuan Mizoram chu fur ruahtui a tam avangin sorkar laipuia Rigid Pavement hmanga kawngpui sial tawh zawk tura a rawtna zirchiang tura hmalakna kalpui rang tura chahin, hemi thuah hian Union Minister Nitin Gadkari, MoRTH chuan Mizorama rigid pavement hmanga kawngpui sial chungchang lo zirchiang turin NHIDCL te hi a hrilh tawh a ni.
Tun hnaia kawngpui min avanga Thingfala Mamte ‘T’ Baptist Kohhran Biak In chim chungchang pawh chief minister hian a sawi chhuak a. NHIDCL hotute chuan Deputy Commissioner Office-in zir chian tawh thu leh an zirchianna chu Project Management Unit-ah an thehluh tawh thu an sawi a. NHIDCL Headquarters lama an kaltir zel tur thu an sawi.
Chief minister-in hna hmanhmawhthlak leh ngaih pawimawh ngai bik a sawite chu Mizoram Regional Executive Director Adelbert Susngi chuan chak taka an bawhzui tur thu a sawi bakah, NHIDCL lam hian an hnathawhna hmun hrang hranga harsatna an tawhte chief minister hnenah hian an thlen a. P&E department nena hmalakho an mamawhna hmun te, ram neitu chiang lo chin fel la ngai te, Aizawl Eastern side bypass road laih tura harsatna an tawh mek te, zangnadawmna lama harsatna an tawh hrang hrang te, ram neitu thenkhatin kutthlak an phal loh vanga hna an thawh theih lohna hmun te leh chak zawka hna an thawh theih nana an mamawh dangte an sawi bawk.
An inkawmnaah hian PWD Minister Vanlalhlana, Commissioner & Secretary to CM Vanlaldina Fanai, P&E Secretary K. Lalrinzuali, PWD E-in-C Er. H. Zoramliana te an tel.