Netflix chuan an chhuahtirh atanga series lar ber tihngam, ‘Squid Game’ -a phone number an dah chu tibo tawhin insawi mah se, hmeichhe pakhat tan erawh a mobile phone number a lo nih avangin call dawn sen loh a lut reng mai si.
South Korea drama bon tak maiah hian sum mamawh ngawih ngawih contestant te chu sawmkhawmin, sum itawm tham hlawhchhuak tura thih leh dam kara an tel tirna a ni tih kan hre fur awm e.
He hmeichhia hian film-a tihlan number chu ama phone number ngei a nih thu a sawi a, intihsiaknaa tel ve an duh thuin minute tin tih mai turin an be tluk tluk mai a ni, a ti.
Seongju-a cheng sumdawng hmeichhia hian local media te a hrilh danin, Netflix series lar ber tihngam an chhuah atang kha chuan nitin maiin text leh call sang chuang zet a dawng tluk tluk a, nunphung leh khawsak phung a tibuai hneh hle, a ti bawk.
He phone number hi kum sawm chuang ka hmang tawh a, mak ka ti ngawih ngawih. A chhuah atanga thla khat chhung ringawt pawh khan ka phone atanga number ka delete ringawt pawh hi 4,000 chuang a tling. A tirah tak chuan a ngaihna ka hre mai bik lova, mahse thiante’n ka number hi Squid Game-ah tihlan a nih thu min hrilh hnu-ah thil awmdan ka hre ve chauh a ni,” a ti.
Media lam tarlan dan chuan he hmeichhia hian zangnadawmna an ram pawisaa Maktaduai 5 ($4,178) pek an tum chu a hnawl a, Netflix lam erawh chuan zangnadawmna chungchangah thu leh hla an neih loh rualin, fan te chu he number be pawp lo turin ngenna an siam a ni.
Thuchhuah an siamah, “Production company te nena thawk hovin, hemi chungchang hi chinfel thuai tum a ni a, a tul ang zelin hma kan la ang,” an ti.
‘Squid Game’ hi September 17, 2021 khan Netflix-ah tihchhuah tan niin, ni 10 chhung lekin ram 90 chuangzet ah No. 1 a ni pha hial a nih kha. A pui miah miah hle.