- K. Hmingthankaia
City bus-te rei tak tak stand-a an ding thin ka ngaimawh thu hi vawi tam sawrkar hmasa lam atang tawhin ka lo aupui tawha. Mahse, a sawt si lo chu a tawp nan tiin, August ni 14. 2025 khan dengkhawng deuh takin ka sawi leha. Rin loh takin a tuk lawkah sawrkar, STA chuan city bus-te passenger chhuk chhung leh lawn chhung bak stand-a din phal loh tih thupek chu a rawn puang ta rup mai. Ka lawm teh asin. Tichuan, he thupek hman tan ni September ni 1. 2025 chuan kei pawh bus ka chuangkual chiama, thupek chu an zawm that thawkhat avangin ZPM Sawrkar chunga lawmthu sawina chu ka ziak ta nghala, chanchinbu hrang hrang bakah youtube lama lo chhiarchhuak hman tawk pawh an awm a ni.
Mahse, Sept. ni 11. 2025-a ka’n teikual leh chuan bus tumahin an lo zawm leh ta reng reng lo maia, mi thenkhat ka’n zawh chuan, ni 1 bak kha an zawm hleinem, a tuk atang chuan an tihdan ngai bawkin an ti leh vek alawm tiin min hrilh a ni. Stand tinah a hma ang bawkin an lo innghak chhuak leh ta vek mai a nih chu!
Ka rilru na, ka zak bawk si leh thinrim bawk si chuan thil hrang hrang ka ngaihtuaha. Ka vei velnaa thil hrang hrang ka hmuh leh hriatte apiang chuan min tibeidawng zo veka. Tu sawrkar mah hi beisei tlak tak tak an awm lo a nih hi. Vantlang leh sawrkar hmun tumahin an zah si lo. Kawngpui leh footpath nise, tuman an zah bawk si lo. Sawrkar lahin thupek han siam ve bawk thin mah se, kengkawh leh ngam tak tak chuang bawk si lo. Tlawmngaihna leh aia upa zah tihte hi inchhuang tak hian kan han sawia, a tak takah hmuh tur a vang tawh si. Bus chhungah te hian upa leh nau pawm thutna kian duh an awm ta mang si lo. Kan ram hi a chhe zo ta a nih hi tiin ka rilru chu a vak kual nasa hlea, thil dik lo ka hriat hrang hrang chu ka mitthlaah a lo lang zut zuta.
Mahni hmasial leh duham, zaktheilo mahni duh duh dana khawsa apiangte hi dingchang leh nihlawh an ni ta zawk mai a. Chutiang mite chu sawrkar leh vantlang pawhin an hlau zel bawk si. Thil tha zawk beiseina avanga au au leh, ngaihtuahna lo sen ve vak vak hi a tulna a awm tawh lo.At at duh bik tawh tur a ni lo. Theihtawpa mahni hma chauh sial ve tawh mai hi mifing nihna a nih tawh mai dawn hi. Mahni tanghma chauh haiin sawrkar pawh hi nek ve pawp pawp tawh ila a ni mai, tiin ka insawh phei nasa ta mai a ni.
Engpawh nise, city bus chunchangah chuan, ka rilru na, zak bawk leh thinrim bawk si, tawt tun hi STA office-ah ka lut phei anga, Transport Director bulah ka inbun ruak phawt anga, chutah a piah lawkah Traffic SP ka hmu leh anga, chumi hnuah a thlang lawk, Transport Minister inah ka lut thla leh ang, ka ti a.
STA office-ah chuan, kha an thuchhuah order copy kha ka dila, an print chhungin Deputy Director bulah chuan ka lo inbun ruak then phawta. Director chuan meeting a lo nei meka, an meeting lai ngeia luh ka duh thu ka sawi naa, lo nghak hram rurin min tih avang chuan, tlai tawh hle mah se ka nghak ta ngat ngata. Tlai dar 4-ah chuan ka lut ta a ni.
Director chuan min lo dawngsawng tha hlea. Keiin, ‘ In thu chhuah hi in enzui em? Tu enzui, enforce tur nge? ‘ ka ti a. Ani’n, ” Traffic lamin an lo bawhzui mai tur a ni a, engpawhnise, hei, Prime Minister lo kal tur vang hian kan buai em em veka, inah pawh kan haw hman lo a ni ber maia, kar hmasa lam kha chuan an zawm tha tih thu kan dawnga, tunkar chuan engmah dang kan ngaihtuah hman lo a ni. Hei, nangmah ngeiin min rawn hrilha, a lawmawm hle mai. Traffick SP kan phone nghal ange” a ti a. Keiin, ‘ Traffic SP i phone chuan ka luh phei a ngai lo a nih chu’ ka ti a. SP pawh PM lo kal tur chungchangah meeting a lo neia, Additional SP chu a be ta a. Thil awmdan a hmaihma ngeia ka sawi thu leh, an naute lo thlithlaitir deuh turin a ngena. Kei pawh ka veng deuh hawk a ni.
Director nen chuan rei tak kan titi a, ram hmasawnna lama ngaihtuahna lo hmang ve thin tak a lo niin ka hriaa. Ngaihtuah zui atana pawimawh tur chi tak, kan ram tana tangkai tura ka rin, thu bengvar thlak te ka hriat phah a ni. Kar thara Bangalore lama a zin hmaa Traffic SP nen an lo enzui tur thu leh, he kan inhmuh ni September ni 11. 2025 zan la la hian he ka thu sawi chungchang hi Traffic SP a lo sawipui tur thu min hrilha, kei pawhin lo ti hram turin ka ngen bawka. Tichuan, tlai dar 5-ah chuan lawmthu sawia min chibai pahin, an department hming chuanna pen chu min pe a, kei pawh ngaihtha takin ka haw ta a. Ka zah thu chanchinbua puanzar ka tum pawh chu tul ka ti rih ta lo a ni.
Nimahsela, September ni 18.2025-a ka’n chhuahvah leh meuh chuan, city bus ho chu an duh duh danin an lo la khawsa ta reng tho a ni tih chu ka han hmu leh ta. Traffic police-ho awm reng chung pawhin an ding leh veng veng tih chu ka han hmu leh ta a ni. Sawrkar leh Department lam chuan hma an la miah lova, an ngai pawimawh hek lo tih chu tu hrilh mah ka ngai ta lo. September ni 11-a sawrkar leh kan ram awmdan ka hmuh dan chu a dik a ni tih ka hrechiang belh leh ta hle a ni e.
Tu sawrkar mah hi eng kawngah pawh hian beisei viau tlak tak tak an awm lova, anmahni leh an party tan leh, an mi leh sa leh an duhsak zawng, an thurualpuite tan lo chuan an mit leh beng, an ngaihtuahna tak tak an seng ngai lo tih hi ka hrechiang ta hle a ni. Tun ZPM sawrkar pawh hi beisei viau mah ila, thil hrang hrang ka thlir hian, a hmaa mite ang bak hi chu beisei tehchiam bik tur awmin ka hre ta meuh lo a ni.
Thil ho lutuk, city bus-te stand-a ding reng lova tlan tir nghal zel mai mai pawh an ti hleithei bik lo a nih chuan, thil dang phei chu beisei san viau chi niin ka hre ta lo a ni. He thu chanchinbua a lo chhuah hunah emaw, he thu ziah avang emawa bus-te chu ding reng lova an lo tlan tlang leh ta zel a nih leh a tha lamah kan ngai tawh mai a ni ang chu.
City bus chungchanga ZPM sawrkar chunga lawmthu ka lo sawi thawt thawt kha dawt mai a lo nih si avangin ka zaka, tunah pawh hian thil tha zawk thlen beiseia tute emaw hmuh kual chu tul ti tawh lovin, ti hian ka rawn sawi ta mai a nih hi. Beisei taka ZPM sawrkar kan lo thlirna ‘TARMIT’ pawh hi thlak a ngai dawn ta em ni? ka ti ta hial mai.
Engpawhnise, thil tha zawk beiseina avanga thil eng eng emaw kan lo sawi ve ten awmzia a neih leh neih loh te leh, thil hrang hranga negative leh positive te chu kan lo chhinchhiah ve zel anga, damtea kan awm chuan, inthlan leh dawnah kan la sawi leh a ni ang chu.