Aizawl: Lunglei-a school lian ber Baptist English School chuan tunlai tlang hri lengin an naupangte a man nasat avangin ni hnih chhung chawlh an puang a. School thuneituten nu leh pate hriatthiamna ngenin thuchhuah an siam.
An thuchhuahah tunlaia tlang hri lengin an school a chiah hneh hle niin an tar lang a. Chawlhkar hmasa atang khan sikul naupang damlo an pung chho zel a, natna hian chawlhkar khatte a awh tlangpui a, an inkai darh chak hle niin an tar lang bawk.
Thawhtanniah khan damlohna avangin zirlai 325 an kal thei lo a, Thawhlehniah khan zirlai 445 an kal lo leh a. Nilaini khan zirlai 528 an kal theih loh bakah zirtirtu kal theilo leh nuamsam lo eng emaw zat an awm bawk.
Naupang kal lo an tam avangin class test an neih theih loh phah nual a, Neltas exam tur pawh an tawlh hla zel rih bawk a. Zirtirna pawh a pangngaiin an kalpui thei lo a ni.
Doctor-te an rawn a, thawktuten ngun taka an ngaihtuah hnuah nimin leh vawiin hi chawlh puan mai an titlu ta a. Inrinni leh Pathianniin a zawm dawn bawk avangin inkai darh pawh a ziaawm phah an beisei a. Chawlhkar thar lamah pawh dam chiang lo leh damkawr lutuk chu sikul kal lo turin an inngen a ni.