Chief Minister Lalduhoma’n Mizoam State Project Monitoring Committee (MSPMC) hnathawh tawh chin chu a tha tawk hle tih a sawi.
CM Conference Hall-ah chief minister-in MSPMC Annual Report 2024-25 chu Nilaini khan a tlangzarh a. Project Monitoring Committee hi Mizoram mipui aiawh zo tak ni tura din a nih thu leh member tam tak nei vek pawl hrang hrang hruaituten thukhat vuaa Mizorama hmasawnna hnathawh an endikho hrim hrim pawh hi a ropui tih a sawui.
Chief minister chuan rawtna tha tak tak an neih tawhte rinchhanin kal dan tha zawk an kalpui chu a tangkai hle tih a sawi a. Annual report hmasa ber an zo va, tun atang chuan ZPM an sorkar hnua an hmalakna lam te an en tan thei tawh dawn a. A tir atanga an vilpui hnate chu a tha tawh hle turah an ngaih thu a sawi.
Ram tan hna tha an thawk mek a, an thawh tawh chinte pawh a tha tawk hle tih sawiin chief minister chuan, “Tumah hlau suh u. Ruling mi leh sa nih chhuang an lo awm a nih pawhin hlau suh u, in lamah kan tang zel ang,” tiin an hmalak zelna turah huai taka kal turin chief minister chuan a chah.
Member Secretary Er. Lalthanzuala Ralte chuan annual report chungchang a sawi fiah a. An project endikte chu work profile format siama planning department atanga an lak khawm an ni a. Heng project an lak khawm atang hian mipui nekna leh bihchian ngai zual nia an hriatte zirchiangin an hnathawh dan te, hnathawh tawh chin te, hna that leh that lohte hmanraw hman chungchang te, expenditure chungchang te leh harsatna an tawh te an en a ni.
Sorkar kum 2024-2025 chhungin Mizoram state chhunga project 47 an tlawh zinga 42-te chungchang annual report-ah hian dah a ni a. District panga – Champhai, Kolasib, Mamit, Lawngtlai leh Siaha-a project kal lai mek ni tawh lo, hman tangkai lohva dah tawl tak Mizoram Polytechnic building-te pawh a tel a ni.