Aizawl: Health Minister Lalrinpuii chuan Mizorama PHC, CHC leh District hospital tinah pharmacist dah vek tura hmalak a nih thu a sawi.
Nimin khan Mizoram State Pharmacy Council buatsaihin, Vana pa hall-a World Pharmacists Day 2025 lawmna a hmanpuitu Health Minister Lalrinpuii chuan, pharmacist-te chu damdawi siam dan atanga mipuite hnena hralhchhuah dan thlenga thiamna bik nei an nih avangin an pawimawh a, Healthcare system chu an tel lovin a kal thei lo tih a sawi a. Damdawi dawr reng reng chu, danin a phut angin damdawi lam thiam, pharmacist dik takte ngeiin nghakin, an hun pumin damdawi dawr chu an vil vek tur a ni, a ti.
Health minister chuan tun dinhmunah pharmacist – 17 (contract), Assistant Director pathum leh Drugs Testing Laboratory-a thawk tur Junior Analyst pathum lakna tura hma lak mek a nih thu a sawi a. Heng bakah hian Mizorama PHC, CHC zawng zawng leh district hospital tinahte pharmacist dah vek tura hmalak a nih thu a sawi bawk.
World Pharmacists Day lawmnaah hian khual zahawm Dr. Sanjay D. Sawant, Director, RIPANS leh Dr. H. Lalhlenmawia, Vice President, Mizoram State Pharmacy Council ten thu an sawi a; he hunah hian Mizorama Pharmacy zirna college hrang hrangte an tel a ni.