Tun season-ah a vawi khat nan Liverpool an tlawm a, Inrinni zanah 2-1 in Selhurst Park-ah Crystal Palace an hneh lo va, coach Arne Slot chuan a naute a dem.
Liverpool coach chuan an chak loh chhanah a player-te chu mawhphurtu an nih thu a sawi a, a bik takin player pakhat a dem.
First half tir lamah set-piece atangin Ismaila Sarr chuan Palace tan a khung a, first half-ah mual neitu an khel tha a, goal khat aia tam khung thei dinhmunah an ding.
Hun tawp dawn minute thum a la awmin bench atanga lut, Federico Chiesa chuan Liverpool siphurh a sut a. Hun tawp dawn tak tak, minute 90+7-ah Edward Nketiah chuan Palce chakna goal a khung a, 2-1 hnehna an chang.
Goal hnuhnung ber a lutnaah hian Jeremie Frimpong chuan a chân, Nketiah chu a châng hneh tawk lo a, hmun thawl pein box vei lam sir atangin a chhuih lut.
“Keimahni bak dem tur dang an awm lo, kan inven dan khan duhthu a sam lo va. Kan player zinga pakhat chu counter-attack neih inbeiseiin tlanchhuah a tum a, hun tawp dawn tak tak a ni tawh a, kha kha chu awmzia a awm tawh lo a ni, kan defending dik loh vang a ni,” a ti.
“Goal khung tuma nawr ringawt kan rilrua a awm vang pawh a ni a, a nih loh pawhin player pakhat khan nawr ringawt a ngaihtuah vang pawh a ni thei. Kha avang khan goal kan chhuah phah a, kan chak loh phah bawk a ni,” a ti.
First half-ah Palce an khel tha a, second half-ah erawh Liverpool game a ziaawm a. Slot pawhin Palace chu chak phu zawk an nih thu a sawi bawk.
“First half kan en kha chuan kan khingpuite kha chak an phu a. Goal hnih emaw, goal thum emaw khung kha an phu a. Second half-ah erawh kan khel tha zawk a, inkhelh pum thlir khan chak phu zawk an ni a. Palace lakah hian kan vawi khat chak lohna a ni lo a, anni hi hmachhawn an harsa khawp mai,” tiin Slot chuan a sawi bawk.
Liverpool captain Virgil van Dijk pawhin an insiam that vat a ngaih thu a sawi a, chak lo mah se, chiaina tur erawh a awm loh thu a sawi.
“Kan chak loh avangin ka hnual hle, hun tawp dawnah goal an khung leh a, khatianga chak loh kha chu a hrehawm a. Kan chak loh avang khan lungngaihna tur awmin ka hre lo, kan insiam that vat a ngai thung ang a. Kan khel tha tawk lo va, Palace kha thiah an har a, coach-in khelh dan tur a ruahman angin felfai takin an khel a ni,” a ti.
“Defending ngaipawimawh viau mah se, goal khung theihna an nei tho bawk si nen. Eng pawh nise, a bul ber chu kan khelh that tawk loh vang a ni. Kan fimkhur tawk lo a, khawvela goalkeeper tha ber kan nei hlauh a, ani khan min chhanhim hnem hle,” tiin van Dijk chuan a sawi.