Aizawl: Labour, Employment, Skill Development and Entrepreneurship (LESDE) Minister Lalnghinglova Hmar chuan Mizo Students’ Union (MSU) General Headquarters buatsaih, LESDE UPSC Challenge Inter College Quiz Competition 2025 kharna hun chu Ignite Studio, Khatlaah khuallian niin Inrinni zan khan a hmanpui.
LESDE Minister Lalnghinglova Hmar chuan UPSC Challenge Quiz Competition buatsaih a ni chu lawmawm a tih thu leh Mizo thalaite’n UPSC hnuaia exam hrang hrangte hmachhawn tura chawhphur an ngaih thu a sawi a. LESDE department hnuaia Mizoram Building & Other Construction Workers Welfare Board (MBOCWWB) chu mipuiin an hriatchian a, an inziahluh a, a hnuaia hamthatna an dawn theihte an hlawkpui theih nana he quiz hi an sponsor thu leh thalaiten eizawnna rahbi an tuk theih nana an puihbawm thin thu a sawi.
Quiz Competition kharna hun hi MSU General Secretary Zodinsanga’n kaihruaiin, MSU President B. Lalkhawngaihzuala’n thu a sawi bawk.
He inelnaah hian college 14 telin, Mizoram Christian College chu pakhatna niin, lawmmanah Rs 30000 leh thuziak mawi an dawng a. Pahnihna chu Govt. Serchhip College niin, citation leh Rs. 10,000 an dawng a. Pathumna Govt. Hrangbana College pawhin citation leh Rs. 7,000 an dawng a. Lawmman te hi khuallian Lalnghinglova Hmar chuan a hlan a ni.