World Rabies Day 2025 chu Mizoramah pawh hman a ni a. A thlawna ui â hri venna vaccine (anti-rabies vaccine) pek beihpui thlak niin, he ni pual hian Mizoram pumah ui 2,600-te hri venna pek an ni.
World Rabies Day hi September 28-ah hman thin ni mah se, kumin hi Pathianni a nih avangin Inrinni khan Mizoram hmun thenkhatah AH&Vety. Department, Mizoram State Veterinary Council (MSVC) leh Indian Veterinary Association (IVA), Mizoramte tangkawp buatsaihin hun hman a ni.
He ni puala State Veterinary Polyclinic Hospital, Khatla, Aizawla hun hmanah Dr. M. Zohmingthangi, Addl. Director (VS&PH), AH&Vety. Dept. kaihhruaiah Mizoram State Veterinary Council President Dr. Lalremliana chuan ui â hri (rabies) chu natna hri hlauhawm tak a nih avanga vaccine tha taka lak a pawimawh thu a sawi a. Rabies chu a vei tawhten an thihpui ngei ngei thina ngaih a nih thu leh dam chhuak sawi tur tlemte chuah an la awm thu sawiin, ram changkangah chuan he hri hi an buaipui vak tawh loh laiin, Asia leh Africa ramah chuan mi tam takin an la thihpui a, a bikin ui seh avangin thubuai a la tam phah hle tih a sawi.
Dr. Lalremliana chuan khawlaiah neitu nei lo ui chhuak an awm loh avangte, vaccine pek an ngaihpawimawh avangte leh veterinary ni pawimawh bikah free vaccination leh health camp-te tha taka kalpui thin a nih avangtein Mizoramin rabies nuai bo theihna kawng an la neih that hle thu a sawi.
Kumin World Rabies Day thupui atan hian ‘Act Now: You, Me, Community’ tih chu hman niin, Aizawl District-a hmun pathum – State Veterinary Polyclinic Hospital, Khatla, Zemabawk North YMA Hall leh Animal Feed Plant, Ramrikawn bakah District Vety. Hospital tinahte hun hman niin, a thlawna ui â hri venna vaccine (anti-rabies vaccine) pek beihpui thlak a ni a. He ni pual hian Mizoram pumah ui 2,600 te hri venna pek an ni.